Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 48

Mwan Ikundj wa Mwadiamufu Amuchiricha ku Mwom

Mwan Ikundj wa Mwadiamufu Amuchiricha ku Mwom

Pa chisu cha chang, Yehova wamuleja Elija anch: ‘Tumbuk uya ku Sarepita. Mwadiamufu udia kwinikwa ukukwinkish yakudia.’ Pashikay ku chis cha musumb, Elija wamumana mwadiamufu kazwendj ukat kunonijol nkuny. Wamwita mem ma kuna. Payay kumusendin mem, Elija wamutazuka wamwel anch: ‘Nletinaku kand amboku chikunku cha mukat.’ Pakwez mwadiamufu wamwakula anch: ‘Nikwetap mukat wa kukwinkish. Nikwet kwam ching wung ukemp ni many makemp kusu mwi nsab mulong wa dijuku diam.’ Elija wamuleja anch: ‘Yehova wakana anch, ang wansadin mukat, wung ni many mey makupwap kushik ni pakunakina ruval.’

Chawiy, mwadiamufu waya kwol kwend, wamusadina muprofet mukat. Mudi mwakanay kamu Yehova, mwadiamufu ni mwanend ikundj ikala ni yakudia pa chisu cha chang. Chimpay chend chizula wung ni nsab yend yizula kand many.

Kupwa, kwashikena chom chimwing chiyimp nakash. Mwan ikundj wa mwadiamufu wayela nakash kupwa wafa. Mwadiamufu  wamwilembina Elija chakwel amukwasha. Elija wamusenda mwan winou mu makas mend ni waya nend mu kapalikany ka piur. Wamuladika pa ulal ni walembila anch: ‘A! Yehova, nakwilembil amboku muchirishaku mwan winou ku mwom.’ Wij mulong wak chading chom chishimokishena chafanyinay Yehova kusal? Mudi mutwija kamu, kwikil muntu ap umwing wading wavumbulawap kal. Mwadiamufu winou ni mwanend kadingap in Isarel.

Pakwez, mwan ikundj winou wachirika ku mwom ni wasambisha kupim! Elija wamuleja mwadiamufu anch: ‘Tal! Mwaney ikundj udi mwom.’ Mwadiamufu wasangara nakash ni wamuleja Elija anch: ‘Udi chakin kamu muntu wa Nzamb. Nij mwamu mulong ulondin ching yom ya kulejau kudi Yehova kulond.’

“Talany ankwaj. Kakukunangap mbut, ap kwangul. Awiy kakwetap jinkil ap yikumbu ya kulamin yom, pakwez Nzamb ukat kuyidish! En ukwetany usey ujim kupandakanamu atujil!”—Luka12:24