Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 47

Yehova Wamukasikesha Elija

Yehova Wamukasikesha Elija

Pateshay Jezabel yom yayishikena aprofet a Bal, wajimana nakash. Watuma mazu kudi Elija anch: ‘Diamashik niyey ukufa mudi mwafilau aprofet a Bal.’ Elija wova wom nakash ni wachinina mwimpay. Walembila anch: ‘Yehova nikwetap kand chom cha kusal. Nlika kwam nifa.’ Elija wading waziyang kal kamu ni walala mwinshin mwa mutond.

Mwangel wamulangwisha pakemp pakemp ni wamuleja anch: ‘Lank chakwel udia.’ Elija wamana mukat wakwoshin pa mayal ni nsab ya mem. Wadia mukat winou ni wana mem kupwa walala kand. Mwangel wamulangwisha kand ni wamwela anch: ‘Diang. Ukwet kuswir kwa usu mulong udi mu weny.’ Chawiy Elija wadia nakash. Kupwa wasala weny muten ni uchuku mu machuku 40 djat ni pashikay ku Mukandu wa Horeb. Kwinikwa, Elija wandama mu mandam walal mwinimwa. Pakwez, Yehova wamwipula anch: ‘Elija usadin yom ik pinap?’ Elija wakula anch: ‘In Isarel ajipin kal kushilamu kwau kwashilaumu. Abumodin kal yintamb yey ni ayijipin kal aprofet ey. Katat akimbin anjipa niyam.’

Yehova wamuleja anch: ‘Yang wimana pa mukandu.’ Chakusambish, rinkind mukash watuta mu mandam. Cha kaad, divu diazala nakash kupwa kweza kasu. Cha kasatu, Elija watesha dizu dikemp dia kunyinyit. Wabwika chifu ni nkandj wend kupwa wabudika wiman ku chis cha mandam. Yehova wamwipula kand mulong wak wachinangay. Elija wakula anch: ‘Nashadin kal kwam amwinam.’ Pakwez, Yehova wamuleja anch: ‘Kiudiap kwey amwiney. Kudi antu 7000 mu Isarel adandamedina kwingifukwil. Yang umutonda Elisha chakwel ikala muprofet pa ndond yey.’ Kapamp kamwing, Elija waya kusal yom yamulejau kudi Yehova. Utongin anch Yehova ukukukwash niyey anch wasal yom yikwitinay kusal? Mwaning, ukukukwash. El tushinshikinany yom yashikena pa chisu cha chang.

“Kangal wanengananany; pakwez, lembilany mu yom yawonsu ni kujikitish ni kumwijikish Nzamb yom yawonsu [yiukimbinanya].” —Filip 4:6, TMK.