Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 45

Kwaurik kwa Want

Kwaurik kwa Want

Padingay Salomon ni kumwifukwil Yehova, mu Isarel mwading chisambu. Pakwez, Salomon wata amband avud a mu jingand jikwau, amband inay ading in kwifukwil akish. Pakemp pakemp, Salomon waswimpa ni wasambisha niyend kwifukwil akish. Yehova wajimana nakash. Wamuleja Salomon anch: ‘Muchid wa Isarel ukwaurik kusambishin mu dijuku diey ni ukwaurik mu yikunku yaad. Nikez kupan chikunku chijim kudi atushalapol ey ni dijuku diey dikuyikel ka chikunku kakemp.’

Yehova wakwata mupak winou patok mu mutapu ukwau. Kashalapol umwing pakach pa atushalapol end, Jerobowam waya mu weny ni wasankanijan ni muprofet Akija. Akija wapwola nkandj wend mu tuyibel 12 ni wamuleja Jerobowam anch: ‘Yehova ukutambul want wa Isarel mu dijuku dia Salomon ni ukuwangan mu yikunku yaad. Tambul yibel dikum mulong yeya ukwikala mwant wa michid dikum.’ Mwant Salomon watesha yom yiney ni wakimba kumujip Jerobowam! Chawiy Jerobowam wachinina mu Idjibit. Kupwa kwa machuku, Salomon wafa ni mwanend Robowam wikala mwant. Chawiy chamanay Jerobowam anch ufanyidin kuchirik mu Isarel.

 Amakurump a mu Isarel amuleja Robowam anch: ‘Anch wayilam antu nawamp, akwikal ashinshamena kudi ey.’ Pakwez murund nend nsand wa Robowam wamuleja anch: ‘Ufanyidin kuyimesh antu mar! Yisadisha midimu ku usu!’ Robowam walondula chiyul cha murund nend. Wikala ni chisum nakash mulong wa antu kupwa antu amubwambwila. Amuteka Jerobowam kwikal mwant wa michid dikum, yijikana kwikal mudi want wa Isarel. Michid yikwau yaad yijikana mudi want wa Yuda, yashala yishinshamena kudiay Robowam. Michid 12 ya Isarel yaurika.

Jerobowam kakatap anch antu aya ku Yerusalem mulong wa kwifukwil mulong kwawiy kwadingay Robowam mwant. Wij mulong wak? Jerobowam wova wom anch antu akutwish amubwambwil ni akuya ku mutambu wa Robowam. Chawiy chasalay an a ngomb aad a utad wa or ni wayileja antu end anch: ‘Yerusalem udi kulemp nakash. Ukutwishany kwifukwil pinap.’ Antu asambisha kwifukwil an a ngond a utad wa or ni amuvuramena Yehova.

“Kangal wabombakanany nau antu akad ritiy. Ov, uyakin ukutwish nchik kwovijan nich kuyip?  . . . Ap mwin ritiy ukufanakan nchik nend muntu wakad ritiy?”—2 Korint 6:14, 15