Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 46

Kupak Kwasadika pa Mukandu wa Karimel

Kupak Kwasadika pa Mukandu wa Karimel

Michid dikum ya want wa Isarel yading ni ant ayimp, pakwez Akab wading mwant muyimp nakash. Wata mband muyimp nakash wadinga kumwifukwil Bal. Dijin diend diading Jezabel. Akab ni Jezabel izwisha ngand ya kabuj nich difukwil dia Bal ni asambisha kuyijip aprofet a Yehova. Chom ik chasalay Yehova? Wamutuma muprofet Elija kuya kumulej Akab mazu.

Elija wamuleja Mwant Akab anch mulong wa yom yiyimp yasadinay, ruval kakunakap mu Isarel. Mu mivu yisatu ni kusut, mbut jaminyap ni antu asambisha kufa ni chipupu cha nzal. Yehova wamutuma kand Elija kuya kudi Akab. Mwant wamwela anch: ‘Yeya uletishina kanrumbangesh kinak! Chidi mulong wa kurumbuk kwey.’ Elija wamwakula mwant anch: ‘Kiyamap niletishina chang chinech. Oku, yeya usadishina mwamu mulong umwifukwidil Bal. El tupaka. Kumangej muchid ni aprofet a Bal pa Mukandu wa Karimel.’

Antu akumangana pa mukandu. Elija walonda anch: ‘Tongany chom chakusal. Anch Yehova Nzamb udi Nzamb wakin mulondulany. Pakwez, anch Bal ndiy nzamb wakin ukutwish kumulondulany. Natek kal kupak kwinoku. Aprofet 450 a Bal afanyidin kurijek mulambu ni kumutazuk nzamb wau ni am nikurijek mulambu wam ni nikumutazuk Yehova. Nzamb ukwakula kusutil ku kasu ndiy Nzamb wakin.’ Antu itiya.

Aprofet a Bal arijeka mulambu wa kupesh. Dichuku diakabuj amutazuka nzamb wau anch: ‘A! Bal, twakula amboku!’ Palikay Bal kwakul, Elija wasambisha kuyisip. Walonda anch: ‘Toyan nakash kamu. Pamwing ap ulel ni ukwet kuswir kwa muntu ukutwisha kumulangwish.’ Kushik ni urel aprofet a Bal adandamen kutazuk. Pakwez kayakulap.

Elija wateka mulambu pa chintamb ni wichilap mem. Kupwa walembila anch: ‘A! Yehova, ngakula amboku chakwel antu ijika anch ey udi Nzamb wakin.’ Pakad kulab  Yehova washirisha kasu mwiur, keza kwosh mulambu. Antu atoya anch: ‘Yehova udi Nzamb wakin!’ Elija walonda anch: ‘Yikwatany aprofet awonsu a Bal!’ Pa dichuku dinedia aprofet 450 a Bal ayijipa.

Pamanau didj pa karung, Elija wamuleja Akab anch: ‘Ruval ukimbin kunak. Rijek ditemb diey chakwel uya kwol kwey.’ Diur diajala ni madj, rinkind wasambisha kutut, mu chisu chikemp ruval mukash wasambisha kunak. Kupwa chang chapwa. Akab wendisha ditemb diend mau kamu. Nich ukwash wa Yehova, Elija waya mau kusutamu ditemb! Ov, milong ya Elija yapwa? El tumanany.

‘Chakwel ijika anch ey, dijin diey Yehova, yey kusu Udia Piur pa mangand mawonsu.’—Kuseng 83:18