Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 40

David ni Goliat

David ni Goliat

Yehova wamuleja Samwel anch: ‘Yang ku chikumbu cha Yese. Umwing wa pakach pa anend ukwikal mwant wa kaad wa Isarel.’ Chawiy Samwel waya ku chikumbu cha Yese. Pamumanay mwan wa kusambish, watonga anch: ‘Nsand winou ukutwish kwikal ndiy.’ Pakwez Yehova wamuleja Samwel anch kandiyap winou. Yehova walonda anch: ‘Am nimening yidia mu muchim wa muntu, nimeningap kuwap kwa mujimbu.’

Yese waleta an amakundj akwau musamban kudi Samwel. Pakwez Samwel walonda anch: ‘Kwikil muntu watondangay Yehova pakach pa an inay. Ov, ukwetap an akwau?’ Yese wakula anch: ‘Kwashal kal mwan umwing kasulans, David. Wayang kal kulam amikoku am.’ Chisu chezay David, Yehova wamuleja Samwel anch: ‘Ndiy winou!’ Samwel wamuzizina David many pa mutu anch ndiy ukwikala mwant wa Isarel.

Chisu chimwing, in Isarel ading kurish njit nau in Filistin, in Filistin ading ni chifuv ikundj mwin kurish njit dijin diend Goliat, ndiy wading kuyirishin. Dichuku ni dichuku, Goliat wayisarumunang in Isarel. Walonda ni dizu dia piur anch: ‘Ntuminany muntu ukurisha niyamam. Anch wawin, tukwikal aswik en. Pakwez anch namuwin, ukwikalany aswik etu.’

David waya mu chibeng cha amasalay a in Isarel ni yakudia ya ayayend ading amasalay. Wamutesha Goliat ni walonda anch: ‘Nikurish nend!’ Mwant Saul wamwela anch: ‘Uchid kwey mwanikanch.’ David wamwakula anch: ‘Yehova ukwinkwash.’

 Saul wamwinkisha David yom yend ya njit, pakwez David walonda anch: ‘Nikutwishap kurish ni yom yiney.’ David wanona ut wend wa ndundu ni waya ku wit, wanona mayal matan, wamatek mwi ntwuku. Kupwa David waya kudiay Goliat. Goliat walonda ni dizu dia piur anch: ‘Mwan mukemp sej kunoku. Nikupan mbij jey kudi atujil ni kudi annam a yidany.’ David kovap wom. Walonda ni dizu dia piur anch: ‘Ey wezin ni mpak ya musamun ni kalembil, pakwez am nezin mu dijin dia Yehova. Urishinap niyetwetu, urishin ni Nzamb. Muntu win mwawonsu udia pinap ukuman anch Yehova ukwet usu kusutamu mpak ya musamun ap kalembil. Ukukupanan en awonsu mu makas metu.’

David wateka diyal mu ut wend wa ndundu ni wamwasa Goliat ni usu wawonsu. Nich ukwash wa Yehova, diyal diamukwata Goliat ni diamwandama pa mpal. Goliat wawa pansh ni wafa. Kupwa in Filistin achina mau mulong wa kupandish mwom yau. Ov, umuchingejidin Yehova mudi mwasalay David?

“Chom chinech chikasiken kud antu, pakwez anch chakasikanap nchik Nzamb ukutwish kusal.”—Marko 10:27