Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 38

Yehova Wamwinkisha Samson Usu

Yehova Wamwinkisha Samson Usu

In Isarel avud aya kand kwifukwil akish, chawiy Yehova wayilika in Filistin chakwel akwata ngand yau. Pakwez kwading in Isarel akemp ading amukatina Yehova. Umwing wa pakach pau wading Manowa. Ndiy ni mukajend kadingap nau an. Dichuku dimwing Yehova watuma mwangel kudi mband wa Manowa. Mwangel wamuleja anch: ‘Ukuval mwan ikundj, ukuyipandisha in Isarel kudi in Filistin. Ukwikal mwin Nazir.’ Wij anch in Nazir ading anany? Ading atushalapol apakamwil a Yehova. In Nazir kayitiyijangap kuyikil nswich.

Mu kusut kwa chisu, mwan ikundj wa Manowa wavadika, amupila dijin anch Samson. Papamay Samson, Yehova wamwinkisha usu nakash. Watwisha kumujip ntambu ni makas mend. Kapamp kakwau, Samson wayijipa in Filistin 30 amwinend. In Filistin amukisa ni adandamena kukimb mitapu mulong wa kumujip. Uchuku umwing pading palelay Samson mu Gaza, aya ku chis cha musumb ni kumuchingel chakwel amujipa pamanch. Pakwez, uchuku nakash, Samson walanka, waya ku chis cha musumb ni waupula rubumbu. Wasenda chis pa makij mend ni waya nich piur pa mukandu udia piswimp ni Heberon!

Kupwa, in Filistin aya kudi mband a Samson, Delila, ni amuleja anch: ‘Tukukufut tunan twa nfalang anch watulej pajingamina usu wa Samson. Tukimbin kumukwat ni kumutek mu rukan.’ Delila wakata nfalang, chawiy witiya. Kapamp kakusambish, Samson walika kumulej mulong wak ukwetay usu. Pakwez wamwilembina nakash kushik ni paziyay ni kumujingunin ujindj wend. Wamuleja anch ‘nswich jam kafanyidinap kujikil mulong nidi mwin Nazir, anch nswich jam ajikil nikushadish usu wam.’ Samson warumbuka nakash pa kumulej yom yiney, kimwawiyap?

Pakad kulab Delila wayitazuka in Filistin wayilej anch: ‘Nijikal ujindj wend!’ Wamuladika Samson tul pa mend mend, ni kupwa  watazuka muntu eza amukil nswich jend. Delila watoya ni dizu dia piur anch: ‘Samson, in Filistin ez kal!’ Samson walanka, pakwez usu wend wading wamupwang kal. In Filistin amukwata, amubuza mes ni amuteka mu rukan.

Dichuku dimwing tunan twa in Filistin akumangana mu tempel kudiay nzamb wau Dagon, ni asambisha kutoy mazu piur anch: ‘Atwinkishay kal Samson kudi nzamb wetu! Amubudisha Samson pol! Asambisha kusengan nend.’ Amuteka pakach pa manguj maad ni asambisha kumusip. Samson watoya anch: ‘A! Yehova, ngikishaku amboku usu pa chisu chinech.’ Pa chisu chinicha, nswich ja Samson jading jasambishin kal kulep. Wabachika manguj ma tempel ni usu wend wawonsu. Mbumbu ja chikumbu jasambisha kuwa, antu awonsu ading mu tempel afa, pamwing ni Samson.

“Nikutwish kusal yom yawonsu mwi ndiy ukata kwinkasikesh am.” —Filip 4:13