Jinsangu piur pa Yeriko japalangana ku michid yikwau mu Kanan. Antu au akwata mipak ya kuya pamwing mulong wa kuyirishikish in Isarel. Pakwez in Gabayon aya ni mupak windj. Aya kud Joshua, adjit masun mapokina ni alonda anch: ‘Tudiokil kwi ngand yilemp. Twateshin jinsangu piur pa Yehova ni piur pa yom yakusadidinanay mu Idjibit ni mu Mowab. Tusukan nen manswik, ni tukwikal atushalapol en.’

Joshua wayitiyija ni wakwata mupak wa kulik kuyirishikish. Kupwa kwa machuku masatu, wajingunina anch kadiokilap kwi ngand yilemp. Adiokil mwi ngand ya Kanan. Joshua wayipula in Gabayon anch: ‘Mulong wak watudimbinanya?’ Amwakula anch: ‘Twading twovil wom! Twad twij anch Yehova Nzamb wen ukat kukurishinany. Twilemb amboku pikil watujipany.’ Joshua wadandamena kulam kushilamu kwend ni kayijipap.

Pakad kulab, ant atan a mu Kanan ni amasalay au eza kuyirishikish in Gabayon. Joshua ni amasalay end enda uchuku  wa kabuj mulong wa kuyipandish. Njit jasambisha pamanch nakash. In Kanan achina mau apalangan. Kwawonsu kwachininau Yehova wayasa mayal majim. Chawiy Joshua wamwita Yehova kwimik muten. Mulong wak wamwita Yehova kusal mwamu anch muten kand kal wimanangap? Mulong Joshua wading umuchingejidin Yehova. Muten wandamap dichuku dinidia kushik ni payiwininau ant a Kanan ni amasalay au kudi in Isarel.

‘Pakwez dizu dien inge, dikala kamu inge; bwat, bwat; chawonsu chikwanzukeshau piur pa mazu minam chidiokil kudi Sakudimban’—Mateu 5:37