Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 34

Gedeyon Wayiwina in Madian

Gedeyon Wayiwina in Madian

Chisu chimwing, in Isarel amubwambwila kand Yehova ni asambisha kwifukwil anzamb amakasu. Mu mivu sambwad, in Madian iyang annam a in Isarel ni asheshang mbut jau. Mulong wa kuyichin in Madian, in Isarel ajingamang mu mandam ni mu mikandu. Amwilembina Yehova chakwel ayikwasha. Chawiy Yehova watuma mwangel kudi nsand umwing dijin diend Gedeyon. Mwangel wamuleja anch: ‘Yehova wakutondin ey kwikal mwin kurish njit wa usu.’ Gedeyon wamwipula anch: ‘Mutapu ik nikutwisha kuyipandish in Isarel? Nidi kwam muntu wa chamwamu.’

Mutapu ik wafanyinay Gedeyon kwikal nich kashinsh anch Yehova ndiy wamutonda? Wateka mavuj ma nnam pansh ni wamuleja Yehova anch: ‘Pamanch, anch mavuj amatalesh kudi maum pakwez pansh palik kutalal, chawiy nikwijik anch ukatin niyipandish in Isarel.’ Mukwacha, mavuj mading matalalang kal pakwez pansh pading paumin! Chawiy Gedeyon wamuleja anch diamashik pamanch, mavuj mikal maumina ni pansh patalela. Pasadika yom yiney, Gedeyon wikala chad ni kashinsh anch Yehova wamutondin kal. Wakumangeja amasalay end mulong wa kurish nau in Madian.

 Yehova wamuleja Gedeyon anch: ‘Nikuyinkish in Isarel usu wa kuwin. Pakwez mulong ukwet amasal avud, ukutwish kutong anch ukuwin njit ku usu wa amwiney. Muleja muntu win mwawonsu ukweta wom achirika kwol kwend.’ Chawiy amasalay 22 000 achirika ku yikumbu yau, ni amasalay 10 000 awiy ashala. Kupwa Yehova walonda anch: ‘Amasalay achid kal avud. Yitwala ku wit ni yileja asambish kuna mem. Lam ching anila mem oku akat kutal mukankuny.’ Ching kwau amasalay 300 awiy ading ababela pading panilau mem. Yehova washilamu anch antu inay akemp akuyiwin amasalay a in Madian adia uvud wa 135 000.

Uchuku winiwa, Yehova wamuleja Gedeyon anch: ‘Katat chawiy chisu chiwamp cha kuyirishikish in Madian!’ Gedeyon wayinkisha antwend miseng ni ansab ajim ni ma torsh mading majindjikinau mukach mwa ansab. Wayileja anch: ‘Ntalany mutapu nisadina, ni salany kamu mudi mutapu nikusala.’ Gedeyon wapepa mu museng, wabarila nsab yend, wakwata torsh wend ku chikas, ni watoya dizu dia piur anch: ‘Mpak ya musamun ya Yehova ni ya Gedeyon!’ Amasalay end awonsu 300 asala mutapu umwing. In Madian azala ni achinina ku mitambu yawonsu. Mu kanrumbangesh kinak, asambisha kurish ayinau. Kapamp kakwau kand, Yehova wayikwasha in Isarel kuyiwin akankuny au.

“Ukash upandakena ukash wawonsu udi wa Nzamb, kiudiap wetwetu.”—2 Korint 4:7