Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 32

Mwin Kutakel Musu nau Amband Atakamena Aad

Mwin Kutakel Musu nau Amband Atakamena Aad

Kupwa kwa kuyitakel antu a Yehova mu mivu yivud, Josua wafa ni mivu 110. Padingay mwom, in Isarel amwifukwilang Yehova. Pakwez pafay Joshua, asambisha kwifukwil akish, mudi mwifukwilangau in Kanan. Mulong in Isarel kadandamenap kumulondul Yehova, chawiy wamulika mwant wa in Kanan utazukinau anch Jabin chakwel ayimesha mar. Antu amwilembina Yehova chakwel ayikwasha. Chawiy Yehova wayinkisha ntakel musu dijin diend, Barak. Wafanyina kuyikwash antu chakwel achirik kudi Yehova.

Debora, muprofet mband, amutuma kuya kudi Barak. Wading ukwet rusangu ra kumulej Barak ridiokila kudi Yehova anch: ‘Send antu 10 000, ni yang usankanijan ni yisak ya amasalay a Jabin ku wit wa Kison. Kwinikwa ukumuwin Sisera mukurump wa chisak cha amasalay a Jabin.’ Barak wamuleja Debora anch: ‘Nikuya pakwez ching twaya ney pamwing.’ Debora wamwakula anch: ‘Tukuya ney. Pakwez ijik anch kayeyap ukumujipa Sisera. Yehova walonda anch akumujip kudi muntu mband.’

Debora waya pamwing ni Barak ni amasalay end ku Mukandu wa Tabor chakwel irijek mulong wa njit. Pateshay Sisera piur pa yom  yiney, wakumangeja matemb mend ma njit ni antu end, aya mwi nkurubuk. Debora wamuleja Barak anch: ‘Nlel diawiy dichuku dikukwinkishay Yehova usu wa ku win.’ Barak ni antwend 10 000 ashirika ku mukandu mulong wa kusankanijan ni yisak ya usu ya amasalay a Sisera.

Kupwa Yehova wasala anch wit wa Kison izul. Matemb ma njit ma Sisera majama mu malau. Sisera washa ditemb diend ni wachina mau. Barak ni amasalay end awina yisak ya amasalay a Sisera, pakwez Sisera wachina! Wachina ni wajingama mu mwinkand wa mband umwing utazukinau anch Jayel. Mband winou wamwinkisha mayel chakwel ana ni kupwa wamubwika mbulangach. Mwin kurish njit winou walala tul. Kupwa, Jayel wamuzomba pakemp pakemp ni wamupampa mubur ku mutu wend, chad wafa.

Barak waya kumukimb Sisera. Jayel wabudika mu mwinkand ni wamwela anch: ‘Andam. Nikukulej muntu ukimbina.’ Barak wandama ni wamumana Sisera ulel wafang kal. Barak ni Debora amutumbisha Yehova ni miminy mulong wayinkisha in Isarel usu wa kuyiwin akankuny au. Mu mivu 40 yalondulaku, in Isarel ading mu chisambu.

‘Amband alejena rusangu ruwamp adi chisak chijim cha amasalay.’—Kuseng 68:11