Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 23

Kushilamu kudi Yehova

Kushilamu kudi Yehova

Angond piswimp aad kupwa kwa kudiokal mu Idjibit, in Isarel ashika ku Mukandu wa Sinai ni asala chibeng. Yehova wamutazuka Moses kuya pa mukandu ni wamuleja anch: ‘Nayipandish kal in Isarel. Anch adandamen kwinziyin ni kuziyil ku yijil yam, akwikal antu am a pakampwil.’ Moses washirika ku mukandu wayilej in Isarel yom yamulejau kudi Yehova. Mutapu ik wakulau? Akula anch: ‘Tukusal yom yawonsu yalonday kal Yehova kusal.’

Moses waya kand ku mukandu. Kwinikwa Yehova walonda anch: ‘Nikwambamb ney dichuku dia kasatu. Yileja antu anch kangal ez ku Mukandu wa Sinai.’ Moses washirika ku mukandu wayileja in Isarel mulong irijeka chakwel amutesha Yehova.

Kupwa kwa machuku masatu, in Isarel amana milayilay ni didj dilimina diabwika pa mukandu. Atesha kand dizu dikash ni chidjimin cha mpuny. Kupwa Yehova washirika pa mukandu mu kasu. In Isarel ova wom ni azala. Mukandu wawonsu wanyikeka nakash ni mish yaunyingumuka. Chidjimin cha mpuny chadjima nakash. Nzamb walonda anch: ‘Yam Yehova. Ufanyidinanap kuyifukwil anzamb akwau.’

Moses waya kand pa mukandu, ni Yehova wamwinkisha yijil piur pa mutapu ufanyidinau antu Kumwifukwil, ni mutapu ufanyidina kwikal yisal yau. Moses wafunda yijil yiney, kupwa wayitanginay in Isarel. Awiy alonda anch: ‘Tukusal yawonsu yatulejay kal Yehova kusal.’ Mwawiy, ashilamu kudi Nzamb. Ov, awanyisha kushilamu kwinoku?

“Mukata [Yehova] Nzamb wey nich muchim wey wawonsu, ni mupim wey wawonsu, ni manangu mey mawonsu.”—Mateu 22:37