Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 27

Amubwambwila Yehova

Amubwambwila Yehova

Chisu chimwing padingau in Isarel mwi mpay, Kore, Datan, Abiram, ni antu akwau 250 amubwambwila Moses. Amwela anch: ‘Watuziyish kal! Mulong wak udia ntakel wetu ni mulong wak Aron udi mwin kupesh mujim? Yehova udi niyetwetu awonsu, kadiap ching niyeyey ni Aron.’ Yehova kasangarap. Wamana anch winou wading wimbwabol kudi ndiy!

Moses wamuleja Kore ni antu ading ku mutambu wend anch: ‘Diamashik ezany ku dizang, ni sendany malong men makwoshin malash. Yehova ukutulej nany udia wendendiy.’

Mu kwacha, Kore ni antu 250 aya kutanijan ni Moses ku dizang. Kwinikwa osha malash mudi in kupesh. Yehova wamuleja Moses ni Aron anch: ‘Aurikany ni Kore ni antwend.’

Ap anch Kore waya kudi Moses ku dizang, Datan, Abiram, ni majuku mau alika kuya. Yehova wayileja in Isarel kwikal kulemp ni minkand ya Kore, Datan, ni Abiram. Pakad kulab, in Isarel aurika nau. Datan, Abiram, ni majuku mau aya pol pa dizang diau. Divu dasambisha kuzal pakad kulab diabarika diayibwik! Ku dizang, kweza kasu ni kamwosha Kore ni antwend 250.

 Yehova wamuleja Moses anch: ‘Ku muchid ni muchid sendaku mukombu wa mwin kutakel, ni fund majin mau. Pakwez ku mukombu wa muchid wa in Levi, fundap dijin dia Aron. Yiteka mu dizang, ku mukombu wa muntu nikutonda kukuminy yisalamb.’

Mukwacha Moses wakumangeja mikombu yawonsu ni wayimekesha kudi in kutakel. Ku mukombu wa Aron kwaminya yisalamb ni yabwika mukobu wawonsu. Mwamu, Yehova wamekesha patok anch wamutonda Aron kwikal mwin kupesh mujim.

“Ziyilany ni kwikepish kudi in kutakel en.” —Hebereu 13:17