Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 25

Dizang Mulong wa Difukwil

Dizang Mulong wa Difukwil

Padingay Moses ku Mukandu wa Sinai, Yehova wamuleja kutung mwinkand wa pakampwil utazukinau anch dizang, kwafanyinau in Isarel kumwifukwil Yehova. Ading kudizambulang mulong wa kudiya nich kuyilau.

Yehova walonda anch: ‘Yileja antu apan yawonsu yikwetau mulong wa kukwash kutung dizang.’ In Isarel apana utad wa or, wa argent, wa kwivre, mayal ma usey, ni usang. Apana mavuj ma amikoku, ndand muwamp, yikit ya annam, ni yom yikwau yivud. Apana ni musangar nakash chawiy chayilejau kudi Moses anch: ‘Yawanyin kal! Kangal kuletany kand.’

Antu avud amakundj nau amband ading ija kutung akwasha kutung dizang. Yehova wayinkisha manangu ma kusal mudimu. Amwing achimang masun, akwau apwatang moj ya mavuj ma annam. Akwau ading kuwapish mayal, asalang yom ya or, ni asongang mabay.

Antu atunga dizang mudi kamu mwayilejau kudi Yehova. Asala disun diwamp dia kwauril nich dizang mu yikunku yaad, chikunku Chitumbila ni Chitumbila Nakash. Mu chikunku Chitumbila Nakash mwading mushet wa manswik, wasalau ni mabay ma mutond mudi wa mukamb ni utad wa or. Mwi Ndond Yitumbila mwading chom cha or cha kutek lamp, tebur, ni chintamb. Mu chipang mwading dilong dijim ni chintamb chijim cha kupeshin. Mushet wa manswik wayivurishang in Isarel  kushilamu kwau mulong wa kumuziyin Yehova. Wij manswik chom ik? Udi mutapu wa kushilamu wa pakampwil.

Yehova wamutonda Aron ni anend amakundj mulong wa kusadin mu dizang mudi in kupesh. Afanyina kudilam ni kupaninamu yakupesh kudi Yehova. Ching Aron mwin kupesh mujim, ndiy wading ni mbil ya kwandam mwi ndond Yitumbila Nakash. Wasalang mwamu kapamp kamwing pa muvu mulong wa kupan mulambu wa yitil yend, ya dijuku diend, ni ya muchid wawonsu wa in Isarel.

In Isarel atunga dizang mu muvu umwing kupwa kwa kubudik mu Idjibit. Ikala ni ndond ya kumwifukwil Yehova.

Yehova wizwisha dizang nich uyaj wend ni didj dabwikang dizang. Padinga didj kubwik dizang, in Isarel avurikang ndond yadingau. Pakwez anch didj diashemunik, ijikang anch afanyidin kushemunik. Afanyina kusend dizang ni kulondul didj.

‘Natesha dizu dia piur didiokil ku ditand anch: ‘Talany! Mwinkand wa Nzamb udi nau antu, ndiy ukez kashakam nau pamwing, niyau akwikal antwend. Nzamb amwinend ukez kashakam nau pamwing, chad ukwikal Nzamb wau.’’ —Kujingunik 21:3