Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 28

Chimbur wa Balam Walonda

Chimbur wa Balam Walonda

In Isarel asala mivu 40 mwi mpay. Awina njit mu misumb yivud mwading antu akweta usu. Pashikau mu kabeng ka Mowab, kwi ngangel kwa Wit wa Yordan, chisu chawanyina kudi in Isarel cha kwandam mwi Ngand ya Kushilamu. Balak, mwant wa ngand ya Mowab, wova wom anch ukushadish ngand yend mulong wawawiy. Chawiy wamutazuka ikundj umwing dijin diend Balam chakwel eza ku Mowab ni ayishing in Isarel.

Pakwez Yehova wamuleja Balam anch: ‘Kangal wayishing in Isarel.’ Chawiy Balam walika kuya. Mwant Balak wamutazuka kand kapamp kakwau ni wamukana kumwinkish chom chawonsu chikukatay. Balam wadandamena kulik. Kupwa Nzamb wamuleja anch: ‘Ukutwish kuya, pakwez ukulond ching yom nikukuleja kulond.’

Balam wakandama pa chimbur wend ni waya kwi ndwum kwa Mowab. Waya ni chitongijok cha kuyishing in Isarel, ap anch Yehova wamukangesha kusal mwamu. Mwangel wa Yehova wamumekena tupamp tusatu. Balam kamumanap mwangel, pakwez chimbur wend wading kumuman. Kapamp kakusambish, chimbur wadiokala mwi njil waya mu masuku. Kapamp ka kaad, chimbur waya wiyas ku rubumbu ra mayal, wamwibubish Balam mwend ku rubumbu ra mayal. Kapamp ka kasatu, chimbur waburamana pansh mukach mwa njil. Chisu chin chawonsu chasalangay chimbur yom yiney, Balam wamubulang mutond.

Kupwa kwa kapamp ka kasatu, Yehova wasala anch chimbur alonda. Chimbur wamwela Balam anch: ‘Mulong wak udandamedina kwimbul?’ Balam wamwakula anch: ‘Mulong ey wanman kal mudi chisup. Anch nading nich mpak ya musamun ing lel nakujip kal.’ Chimbur wamwakula anch: ‘Wankandamin kal mu mivu yivud. Ov, nakusadinap kal kand mwamu?’

Kupwa Yehova wasala anch Balam amumana mwangel. Mwangel walonda anch: ‘Yehova wakubabeshin anch kangal kuyishing in  Isarel.’ Balam wakula anch: ‘Narumbukang. Nikuchirik kwol kwam.’ Pakwez mwangel wamwela anch: ‘Ukutwish kuya ku Mowab, chad ufanyidin kulond ching yom yikulejinay Yehova kulond.’

Ov, Balam wileja chom kanang piur pa yom yiney? Bwat. Kupwa kwa yom yiney, Balam wasala usu wa kuyishing in Isarel tupamp tusatu, Pakwez tupamp twawonsu Yehova wasala anch Balam ayiyukish pa ndond pa kuyishing. Kupwa in Isarel arishikisha Moab, ni Balam amujipa. Chadingap chiwamp anch Balam wamutesha Yehova kapamp kakusambish?

“Likany ris ra mitapu yawonsu, mulong mwom wakin wa muntu kiudiap mu yom yikwetay, ap anch ukwetap nchik mapit mavud.” —Luka 12:15