Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 26

In Kutentish Dikum ni Aad

In Kutentish Dikum ni Aad

In Isarel adiokala ku Mukandu wa Sinai, pading payilau, asutina mwi mpay ya Paran kwi ndond kutazukinau anch Kades. Kwinikwa Yehova wamuleja Moses anch: ‘Tum antu amakundj 12, ku muchid wawonsu tond muntu umwing chakwel aya kutentish (kwendish ngand) mwi ngand ya Kanan, ngand yinikuyinkisha in Isarel.’ Chawiy Moses watonda antu 12 wayilej anch: ‘Yangan mu Kanan ni umanany anch ngand yiwapin ap yiyipin mulong wa ya kudia. Talany kand anch antu ashicha mwinimwa akwet usu ap bwat, anch ashich mu misumb ap mu yibeng.’ Pakach pa in kutentish 12 aya mu Kanan, pading Joshua ni Kaleb.

Kupwa kwa machuku 40, in Kutentish achirika, ading ni chizakas cha mabuj ma nviny, ni ma nfung. In kutentish alonda anch: ‘Yid ngand yiwamp, pakwez antu akwet usu nakash ni misumb yau yikwet mbumbu jilemp.’ Kupwa Kaleb walonda anch: ‘Tukutwish kuyiwin. El tuyany pakad kulab!’ Wij mulong wak Kaleb walonda mwamu? Mulong ndiy ni Joshua ading amuchingejidin Yehova. Pakwez in kutentish 10 alonda anch: ‘Bwat! Mudi antu ajim, ayitabutabu! Tudi mudi ampasu ku mes mau.’

In Isarel aziya. Asambisha kunyinyit ni kulond umwing ni mukwau anch: ‘El tutonda ntakel mukwau ni tuchirikany mu Idjibit. Mulong  wak kuya kwinikwa chakwel akatujip?’ Joshua ni Kaleb alonda anch: ‘Kangal kumubwambwil Yehova ni kangal kwov wom. Yehova ukutulamany.’ Pakwez in Isarel kateshap. Akimba kumujip Kaleb ni Joshua!

Yom ik yasalay Yehova? Wamuleja Moses anch: ‘Yom yiney yawonsu nayisadidina in Isarel, adandamedin kwimbwambwil. Mwamu, akushakam mwi mpay mivu 40 ni akufil mwinomu. Ching anau ni Kaleb, ni Joshua, awiy akushakama mwi ngand yinashilamu kuyinkish.’

“Ov, mulong wak wovilanya wom mwamu? En ukwetanya karitiy kakemp!”—Mateu 8:26