Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 16

Job Wading Nany?

Job Wading Nany?

Mwi ngand ya Us mwading muntu umwing wamwifukwilang Yehova. Dijin diend Job. Wading mpich nakash ni wading ni dijuku dijim. Wading muntu muwamp, ni wayikwashang atuzwendj, adiaafu, ni an anshon. Ov, Job kadingap ni milong, mulong wasalang yom yiwamp?

Job kadingap kija chom, pakwez Satan Djabul wading umutadin. Yehova wamwipula Satan anch: ‘Ov wamumanangap kashalapol wam Job? Kwikil muntu udia mudi ndiy pa mangand. Ukat kwintesh ni usadining yom yidia yiwamp.’ Satan wakula anch: ‘Komb Job ukuziyididin chamwamu? Umuyukishin ni umukingin. Umwinkishin ngand nau annam. Mutambula yom yawonsu ni ukulik kukwifukwil.’ Yehova wamwakula anch: ‘Ukutwish kumupak Job. Pakwez kangal kumujip.’ Mulong wak Yehova wamulika Satan mulong amupak Job? Wading nich kashinsh anch Job ukujijaman.

Satan wasambisha kumupak Job nich yishiken yikash. Cha kusambish, watuma antu atazukinau anch a Sabe mulong wa kwiy angomb ni ayimbur a Job. Kupwa, kasu kwosha amikoku awonsu a Job. Chisak cha in kalideya iya atumel end. Atushalapol alamang annam inay ayijipa. Kupwa kwasadika yom yiyimp nakash. An a Job awonsu ading asadina musambu, chikumbu mwadingau chayiwila ni afa. Job wova nayimp nakash, pakwez kalikap kumwifukwil Yehova.

Satan wakata anch Job amana mar nakash, chawiy chasalay anch Job abudik makwalong ma yitat mujimbu wa kabuj. Job wamana mar nakash. Kijikap mulong wak yom  yiney yawonsu yimushikedin. Pakwez, Job wadandamena kumwifukwil Yehova. Nzamb wamana yom yiney yawonsu, ni wasangara nakash mulong wa Job.

Kupwa, Satan watuma antu asatu kumupak Job. Amwela anch: ‘Wasadin kal yitil ni wayijindjik. Nzamb ndiy ukupupina.’ Job walonda anch: ‘Nasadinap chom chiyimp.’ Pakwez wasambisha kutong anch Yehova ndiy wading musul wa milong yiney, ni walonda anch Nzamb kadingap umubangidin.

Ikundj utazukinau anch Elihu wading uteshin nawamp mambamb minam pakad kulond. Kupwa watoya ni walond anch: ‘Yom yawonsu yiwalondanya kal yidi yiyimp. Yehova udi mujim upandakenamu manangu metu. Kakutwishap kusal chom chiyimp. Umening yom yawonsu ni uyikwashining antu akweta milong.’

Kupwa Yehova wamuleja Job anch: ‘Ov, ey wading kwisu pinatanga diur ni divu? Mulong wak ulondina anch nidiap muntu muwamp? Ulondin, pakwez wijap mulong wak yom yikat kushiken.’ Job witiyina kurumbuk kwend ni walonda anch: ‘Nifil nich. Natesha piur peyey, pakwez katat nakwijik kal lel nawamp. Kwikil chom chikutwisha kukukasiken. Nikwet ushon mulong wa yom nalondina.’

Chisu chapwa kupak kwawonsu, Yehova wamuchirishina kand Job mujimbu uwamp ni wamwinkisha yom yivud kusutamu yom yadingay nich pakur. Job washakama machuku mavud nich mwom uwamp. Yehova wamuyukisha Job mulong wamuteshang ap anch chading chikasiken. Ov, niyey ukutwish kwikal mudi Job ni kudandamen kumwifukwil Yehova chikalap nchik yom yikukushikena?

“En wijany rusangu ra kushimpish kwa muchim kwa Job, chad wijany yom yamusadilau kudi [Yehova]. Mulong [Yehova] wizwil nich kuwap ni riy.” —Jakobu 5:11