Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 20

Yipupu Yikwau Musamban

Yipupu Yikwau Musamban

Moses ni Aron aya kumulej Farao mazu madiokila kudi Nzamb anch: ‘Anch uyilikinap antu am kuya, nikutum angej mwi ngand.’ Yisak ya angej yizula mu yikumbu ya ampich ni atuzwendj in Idjibit. Ngand yawonsu yizula angej. Pakwez mu Gosen, ngand yading yishichau in Isarel, mwadingap angej. Kusambishin pa chipupu chinech cha kanying, yipupu yayikwatang ching in Idjibit. Farao wilemba anch: ‘Mwilembina Yehova chakwel adiosh angej inay. Antwey akutwish kwau kuya.’ Pakwez padioshay Yehova angej inay, Farao waswimpa chitongijok chend. Ov, chom ik chilejay Farao pa mulong winou?

Yehova wamuleja anch: ‘Anch Farao ulikin kuyilikishaku antu am, annam awonsu a mu Idjibit akuyel ni kufa.’ Mukwacha, annam asambisha kufa. Pakwez annam a in Isarel kafap. Farao wadandamena kwitutul, ni kayilikishakwap.

Kupwa Yehova wamuleja Moses kuchirik kudi Farao ni kudjibul maut mwiur. Maut makarumuka rufunfut mwi ngand yawonsu yading yishichau in Idjibit. Rufunfut raletisha makwalong kudi in Idjibit ni kudi annam au. Ap mwamu, Farao walika kuyilikishaku in Isarel.

Yehova wamutuma kand Moses kudi Farao mulong wa kumulej anch: ‘Ov, udandamedin kulik kuyilikaku antu am? Diamashik, ruval wa mayal ukunak mwi ngand yawonsu.’ Mukwacha Yehova  wanakisha ruval wa mayal wa yidjimin ya nzaj ni milaylay. Kwading rinkind mukash watuta wakad kal kumekanangap mu Idjibit. Mitond yawonsu ni mbut yayipa, pakwez ya mwi ngand ya Gosen yayipap. Farao walonda anch: ‘Mwilembina Yehova imika ruval winou! Kupwa ukuyany kwen.’ Pakwez chisu chapwa ruval, Farao waswimpa yitongijok yend.

Kupwa Moses walonda anch: ‘Katat atubol akudia mitond yawonsu yashalang pasutang rinkind.’ Ma miliyon ma atubol adia yom yin yawonsu yashala mu yir ni yashala ku mitond. Farao wilemba kand anch: ‘Mwilembina Yehova chakwel adiosh atubol inay.’ Pakwez kupwa kwa Yehova kudiosh atubol inay, Farao wadandamena kuchinchikish muchim.

Yehova wamuleja Moses anch: ‘Zambul chikas chey mwiur.’ Pakad kulab, diur diawonsu dizula ni mididim. Mu kusut kwa machuku masatu, in Idjibit katwishap kuman chom ap kuman muntu. Ching kwau in Isarel awiy ading ni yitokish mu yikumbu yau.

Farao wamuleja Moses anch: ‘Ey ni antwey ukutwish kuyany. Ching annam en awiy akushala.’ Moses wamwakula anch: ‘Tufanyidin kusend annam etu mulong awiy tukumulambula Nzamb wetu.’ Farao wajimana nakash. Wamubarokina anch: ‘Ndiokala kwa! Anch nakuman kand, nikukujip.’

“Chad antwam akez kaman kand [kushalijan] kwa yom yikeza kamekan, kudi antu atentamina ni kudi antu ayimp, mwaning, kudi antu akata kwinsadil am ni kudi antu akad kwinsadil.” —Malakiy 3:18