Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 15

Yehova Kamuvuramenap Josef

Yehova Kamuvuramenap Josef

Chisu chadingay Josef mu rukan, Farao, mwant wa mu Idjibit walata yilat yakanganyau antu awonsu kurumburil. Umwing wa atushalapol a Farao wamuleja anch Josef ukutwish kurumburil yilat yiney. Farao watuma kapamp kamwing muntu mulong wa kumusend Josef.

Farao wamwipula Josef anch: ‘Ukutwish kurumburil yilat yam?’ Josef wamwakula Farao anch: ‘Mu mivu sambwad mwi ngand ya Idjibit mukez kwikal yakudia yivud, chad mivu sambwad yilondwilaku yikwikal ya kabwakat. Katat chifanyidin Farao atonda muntu wa manangu mulong wa kulam yakudia chakwel kangal antu ey ez afa nzal.’ Farao wamwakula anch: ‘Nakutond kal ey! Ukwikal muntu wa kaad wa usey nakash mu Idjibit!’ Mutapu ik wijikay Josef kurumburik kwa yilat ya Farao? Yehova ndiy wamukwasha Josef.

Kupwa kwa mivu sambwad yakumangejay Josef yakudia, mivu sambwad yalondulaku, kwikala kabwakat mwi ngand yakabuj mudi mwalonday Josef. Antu adiokalang jindond kushalijan mulong wa kuya kuland yakudia kudi Josef. Tatukwend, Jakob, watesha anch mu Idjibit mudi yakudia yivud, chawiy watuma anend amakundj dikum mu Idjibit mulong wa kuland yakudia.

An inay a Jakob aya kudi Josef, ni Josef wayijingunina kapamp kamwing. Pakwez anamakwend kijikap anch ndiy Josef. Amwasina manungin mudi kamu mwalatay padingay mwan mukemp. Josef wakimba kwijik anch anamakwend achikwet michim yiyimp. Chawiy wayileja anch: ‘En wezinany kwendish ngand.  Wezilany kwend mulong wa kwijik jindond jiziyila ja ngand.’ Amwakula anch: ‘Bwat amboku! Tudi an 12 adiokila mu Kanan. Chad mwanamakwetu umwing wafa, ni kasulansong washadin ni Tatuku.’ Chawiy Josef walonda anch: ‘Yangan ukamuletan mwanchen, ni nikukwitiyijan.’ Chawiy achirika kudi tatukwau.

Chisu chaburena kand dijuku yakudia, Jakob wayituma kand anend amakundj mu Idjibit. Payau, amusenda Benjamin. Mulong wa kuyipak anamakwend, Josef wajindjika rupas ra utad wa argent mwi nsaak wa Benjamin mwadinga yakudia, kupwa wayela anamakwend anch awiy iya kal rupas. Patanau atushalapol a Josef rupas mwi nsaak wa Benjamin, anamakwend aziya nakash. Amwilembina Josef ayipup awiy pa ndond pa Benjamin.

Josef wijika chad anch anamakwend aswimpin kal. Josef katwishap kulam muchim wend chisu chilemp. Wasambisha kudil ni walond anch: ‘Yam mwanamakwen Josef. Ov tatuku uchid kal mwom?’ anamakwend ashimoka nakash. Wayileja anch: ‘Kangal wovany nayimp mulong wa yom wansalanya. Nzamb wantuma kunoku mulong wa kukupandishany. Yangany mau umuletan tatuku kunoku.’

Aya amulej tatukwau rusangu ruwamp ni amutwala mu Idjibit. Kupwa kwa mivu yivud, Josef ni tatukwend ikala kand pamwing.

“Pakwez anch en walikany kuyilikishin akwen, Tatukwen kakez kukulikishinanyap kuyip kuwasalanya.” —Mateu 6:15