Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 12

Jakob Watambula Uswan

Jakob Watambula Uswan

Isak wading ni mivu 40 chisu chamwatay Rebeka. Wading umukatin nakash. Kupwa, avala—an ampamb amakundj.

Mukurump wading Esau, ni mwanikanch wading Jakob. Esau wading ukatin kuya mu masuku ni wading chibind muwamp wa annam. Pakwez Jakob wading ukatin kushal ku chikumbu.

Mu machuku minima, mwan ikundj mukurump ndiy wading ni mbil ja kuswan ngand ni mapit anch tatukwend wafa. Mwan winou amutazukang anch nswan. Mu dijuku dia Isak, mu uswan mwading kand kwikal ni yom yamukanau Aburaham kudi Yehova. Esau wapipeja kukan kwinoku, pakwez Jakob wading wij anch kukan kwinoku kwading kwa usey nakash.

Dichuku dimwing, Esau wachirika ku chikumbu waziyang kal nakash mulong wasutisha dichuku diakabuj mu kuzomb. Wova res ra yom yiwamp yading yisukinay Jakob ni wamwela anch: ‘Naziyang kal nakash! Nginkishap yakudia yiney yiwamp [ya sup musuz]!’ Jakob wamwakula anch: ‘Nikukwinkish anch wanlandish bil uswan wey wa kuvadik.’ Esau wakula anch: ‘Ye! Am nikimbin kufa, ing ya uswan kand wa kuvadik kudi am ukwinsadil ik! Ukutwish kwey wasend. Nikwet kuswir kwa kudia.’ Ov, utongin anch chading chom cha manangu kudi Esau kusal mwamu? Bwat. Esau wapana chom cha usey nakash mulong kwau wa yakudia yiwamp.

 Chisu chananapay Isak nakash, chadinga chisu cha kumuyukish mwanend ikundj mukurump. Pakwez Rebeka wasala anch Jakob mwanikanch atambula chiyukish. Chisu chijikay Esau mwamu wajimana nakash ni wakwata mupak wa kumujip mwanamakwend. Isak ni Rebeka akata kumuking Jakob ni amuleja anch: ‘Tumbuk, uchinyina kwa mwanamakwam Laban, kushik ni pakupwila ujim wa Esau.’ Jakob watesha chiyul cha anvajend ni waya kwinikwa mulong wa kwipandish.

“Ov, muntu ukutaninamu ik anch wapitap nchik yom ya ngand yakabuj, chad ndiy washadish mwom wend wa chikupu? Ov, chom ik chikupanay muntu mulong wa kwipandish?”—Marko 8:36, 37