Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 9

Kuvadik Kwa Mwan Ikundj!

Kuvadik Kwa Mwan Ikundj!

Aburaham ni Sara asala mivu yivud mu uruw. Asha chikumbu chau chiwamp mu Ur mulong wa kuya kushakam mu mwinkand. Pakwez, Sara kinanap, mulong wamuchingejina Yehova.

Sara wakata nakash kwikal ni mwan, chawiy chamulejay Aburaham anch: ‘Anch waval ni mwilomb wam, mwan winou ukwikal mudi mwanam.’ Kupwa, Hagar wavala mwan ikundj. Dijin diend diading Isamayel.

Mivu yivud yasuta, chisu chawanyishay Aburaham mivu 99 ni Sara wawanyisha mivu 89, ayendina kudi angendj asatu. Aburaham wayileja angendj inay anch eza apimaku mu urel ni adiaku yakudia. Ov, angendj inay ading anany? Ading angel! Amuleja Aburaham anch: ‘Muvu ukwezap ou, mu chisu chinech, ey ni mukajey ukuvalany mwan ikundj.’ Sara wading uteshin padingay mu mwinkand. Wasipaku ni walonda anch: ‘Chakin kamu nikutwish kwikal ni mwan ing munida ipal omu?’

Kupwa kwa muvu winiwa, Sara wavala mwan ikundj, mudi kamu mwamukanau kudi mwangel wa Yehova. Aburaham wamupila anch Isak, dijin dirumburikina anch “Masip.”

 Pawanyishay Isak mivu yitan, Sara wamumana Isamayel anch wading kumuswingish mwanend. Wakata kumuchidij mwanend ikundj, chawiy wamwita Aburaham chakwel amwopata Hagar ni Isamayel. Chakusambish, Aburaham kasangerap kusal mwamu. Pakwez, Yehova wamuleja Aburaham anch: ‘Tesh kwey yom yawonsu yikukulejau kudi Sara. Nikez kumulam Isamayel. Pakwez, nikuwanyish yom yawonsu nakana kusutil Isak.’

“Ku ritiy kwawiy kwatambwilay Sara ukash wa kwimish divumu pamuchindau wamushilamu anch ushinshamena.”—Hebereu 11:11,TMK.