Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 11

Kupak Ritiy

Kupak Ritiy

Aburaham wamufundisha mwanend Isak kumukat Yehova ni kutek ruchingej rend rawonsu mu kushilamu kwa Yehova. Pakwez padingay Isak ni mivu piswimp 25, Yehova wamwita Aburaham kusal chom chimwing chading chikasikena nakash kuchisal. Chading chom ik?

Nzamb wamuleja Aburaham anch: ‘Musenda mwaney ikundj kapokal ukatila, ndiy kamu Isak, chad yang nend ku mukandu mwi ngand ya Moriya.’ Aburaham kijikap mulong wak Yehova wamuleja kusal mwamu. Pakwez wadandamena kumuziyin Yehova.

Mu kwacha pamanch, Aburaham wamusenda Isak ni atushalapol end aad ni waya nau mu ul wa Moriya. Kupwa kwa machuku masatu ma weny, ayimena mikandu kulemp. Aburaham wayileja atushalapol end kuyichingel chisu chiyilay ndiy ni Isak kupesh mulambu. Aburaham wamuleja Isak kusend nkuny, ni Aburaham wasenda mpak. Isak wamwipula tatukwend anch: ‘Ing nnam tukupesha udi kwisu?’ Aburaham wakula anch: ‘Mwanam, Yehova amwinend ukumumekesh.’

Pashikau ku mukandu, atunga chintamb. Kupwa, Aburaham wamukasa Isak ku makas ni ku mend ni wamuteka pa chintamb.

Aburaham wanona mpak. Pa chisu chinicha, mwangel wa Yehova wamutazuka kudiokal mwiur anch: ‘Aburaham kangal wamusal mwaney chom chiyimp! Katat nijik kal anch komb ey ukwet ritiy mudiay Nzamb, mulong  kiwankishangap mwaney kapokal.’ Kupwa Aburaham wamana ikwal a mukoku wikasikasang kal miseng mu chifukis. Wamusuburila Isak kapamp kamwing ni wapesha ikwal amukoku pa ndond ya Isak.

Kudiokal dichuku dinidia, Yehova wasambisha kumutazuk Aburaham anch murunend. Wij mulong wak? Mulong Aburaham wasala kamu mudi mwamulejau kusal kudi Yehova, ap anch kadingap kija mulong wak Yehova wamuleja kusal mwamu.

Yehova wachirikinamu kand kukan kwend kudi Aburaham anch: ‘Nikez kukuyukish, nikez kuvudish aney ap mbut jey.’ Chinech chading chirumburikin anch Yehova ukez kayukish antu awonsu awamp kusutin dijuku dia Aburaham.

“Mulong Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.”—Yohan 3:16