Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 3

Adam ni Ev Amubwambwila Nzamb

Adam ni Ev Amubwambwila Nzamb

Dichuku dimwing pashalay Ev amwinend, nnak wamwambambisha. Walonda anch: ‘Chidi chakin anch Nzamb wakujidikinany kudia mabuj ma mitond yawonsu?’ Ev wakula anch: ‘Tukutwish kwetu kudia mabuj ma mitond yawonsu kudioshaku ching mutond umwing. Ang twadia dibuj dia ku mutond winou, tukufa.’ Nnak walonda anch: ‘Ukufanap kwen. Pakwez, anch wadian dibuj dia ku mutond winou ukwikalan mudi Nzamb.’ Ov winou wading uyakin? Bwat, mading makasu. Pakwez Ev wamwitiyija nnak. Ev waditala dibuj dined nakash, chawiy chadikatay nakash. Ev wadia dibuj dined ni wamwinkisha nfumwend chikunku. Adam wading wij ang akufa anch amubwambwil Nzamb. Pakwez ndiy wadia.

Kusut kwa dichuku dinida, Yehova wambamba nend Adam ni Ev. Wayipula anch mulong wak amubwambwilang. Ev wamufisha nich nnak, ni Adam wamufisha nich Ev. Mulong Adam ni Ev amubwambwila, Yehova wayopata mu chir cha Eden. Mulong wa kuyikangesh kuchirik mu chir, Yehova wateka angel ni mpak ya musamun ya mizwizu ya kasu ku chis.

Yehova walonda anch wamudimbang Ev niyend chifanyidin kumupup. Kadingap chakin nnak wambamba ni Ev. Yehova katangap annak chakwel asambish kulond. Wading mwangel muyimp wasala anch nnak alonda. Wasala mwamu chakwel amudimb Ev. Mwangel winou amutazukining anch Satan Djabul. Kurutu oku, Yehova ukumushesh Satan ni kakuyidimbap kand antu chakwel asala yom yiyimp.

“[Djabul] . . . kudiokal ku disambishil kamu ndiy wading mwin kujipan. Ndiy kand kal ikalap ku mutambu wa uyakin, mulong uyakin kiudiap mwi ndiy.”—Yohan 8:44