Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 98

Win Kristu Wapalangan kal ku Michid Yivud

Win Kristu Wapalangan kal ku Michid Yivud

Atwimbuy aziyina kwi mbil ya Yesu ya kupalangesh rusangu ruwamp pa divu diawonsu. Mu muvu wa 47 C.C., akadivar a ku Antiosh amutuma Paul ni Barnabas kuya mu weny mu mudimu wa kulejan. In kulejan inay aad akweta mushiku endangana mu Asia Mukemp alejana mu jindond mudi Derbe, Listre, ni Ikonium.

Paul ni Barnabas alejana kudi muntu mwawonsu, mpich ap kazwendj, nsand ap ipal. Antu avud itiyija uyakin piur pa Kristu. Pading pamulejinau Sergius Paulus, nyikel wa Shipre kudi Paul ni Barnabas, mulaj umwing wapakisha kuyikangesh. Paul wamwela mulaj winou anch: ‘Yehova ukukupup.’ Kapamp kamwing mulaj winou wikala mput a mes. Pamanay mwamu, Nyikel Paulus wikala mwin kwitiyij.

Paul ni Barnabas alejana ndond yawonsu, ku chikumbu ni chikumbu, mu sok, mwi njil, ni mu masinagog. Pamwokau chilim umwing mu Listre, antu amana chilay chinech atonga anch antu inay ading anzamb ni akimba kuyifukwil. Pakwez Paul ni Barnabas ayikangesha ni ayileja anch: ‘Mwifukwilany ching Nzamb! Etu tudi kwetu antu.’ Chawiy in Yuda amwing ayipumbula antu chakwel amurishikisha Paul. Antu amwasa Paul mayal, amupwita pansh amudjibul pol pa musumb, ni amusha pifil. Pakwez, Paul wading uchid mwom! Pakad kulab, akadivar eza kumukwash ni amuchirisha mu musumb. Kupwa, Paul wachirika mu Antiosh.

Mu muvu 49 C.C., Paul waya kand mu weny ukwau mu mudimu wa kulejan. Kupwa kwa kuchirik kuyital akadivar mu Asia Mukemp,  washikija rusangu ruwamp ku jindond ja kulemp, mu Europe. Waya ku Aten, Efes, Filip, Tesalonik, ni ku jindond jikwau. Silas, Luka, ni nsand Timote ibomba pamwing ni Paul mu weny wend. Asala mudimu pamwing mulong wa kusal yikumangen ni kuyikwash akadivar chakwel akasikana mu ritiy. Paul wasala muvu umwing ni chikunku mu Korint mulong wa kuyikasikesh akadivar a kwinikwa. Walejana, wafundisha, ni wafunda mikand mulong wa yikumangen yivud. Wasalang kand mudimu wa kutung minkand. Chisu chimwing, Paul wachirika ku Antiosh.

Kupwa, mu muvu wa 52 C.C., Paul waya mu weny wend wa kasatu, wasambishina mu Asia Mukemp. Waya kulemp kwinkaj kwa ngand ya Filip ni kupwa waya mu Korint. Paul wasala mivu yivud mu Efes, mulong wa kufundish, kwokan, ni kukwash chikumangen. Wasalang kand ma diskur ma patok dichuku diawonsu mu jindond jilejinangau antu. Antu avud atesha ni akarumuka. Papwishay kulejan rusangu ruwamp mu jingand jivud, Paul waya ku Yerusalem.

‘Yangany kudi antu a michid yawonsu, yikadishany in kwilejam.’—Mateu 28:19