Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 97

Spiritu Utumbila Wamushirikin kal Korney

Spiritu Utumbila Wamushirikin kal Korney

Mu Sezarey, mwading mukurump wa amasalay wa in Rom dijin diend Korney. Ap anch kadingap mwin Yuda, pakwez in Yuda amulimishang. Wayikwashang atuzwendj ni antu ading mu maswir. Korney wading witiyijin mudiay Yehova ni wamulembilang chisu chawonsu. Dichuku dimwing mwangel wamubudikina Korney ni wamuleja anch: ‘Nzamb uteshining malembil mey. Katatak tum antu ku musumb wa Yopa, kwinikwa kwawiy kushichay Pita ni muleja chakwel eza.’ Kapamp kamwing, Korney watuma antu asatu ku Yopa pading a kilometre piswimp 30 kwinkaj.

Chisu chawiy chinicha mu Yopa, Pita wamana chishimushimu. Wamana annam ading ayijidikau kal in Yuda kudia, ni wova dizu diamulej anch diang. Pita walika ni walonda anch: ‘Kand kal nidiangangap annam ijondila mu mwom wam.’ Dizu diamuleja anch: ‘Kangal kutazuk annam inay anch ijondil, mulong Nzamb wayishitwishin kal.’ Amuleja kand Pita anch: ‘Antu asatu adi ku chis chey. Yang nau.’ Pita waya ku chis ni wayipula antu mulong wak amukimbin. Akula anch: ‘Korney, mukurump wa amasalay a in Rom  ndiy watutumang. Ukutwish kuya kwol kwend ku Sezarey.’ Pita wayileja antu inay kulal kwol kwend mudi angendj. Mukwacha, waya nau ku Sezarey pamwing nau akadivar amwing adiokala ku Yopa.

Pamumanau Pita kudi Korney, wamwasina manungin. Pakwez Pita wamwela anch: ‘Tumbuk! Nid muntu mudi ey. Nzamb wanlejang kwez kwol kwey, ap anch in Yuda kakuyangap ku yikumbu ya antu a Michid yikwau. Katat nleja amboku mulong wak wantazukang.’

Korney wamuleja Pita anch: ‘Kwasut kal machuku manying, nading nimulembil Nzamb, chad mwangel wanlejang anch nikutazuk. Nilemb amboku tufundisha dizu dia Yehova.’ Pita walonda anch: ‘Nijik kal anch Nzamb kakwetap kasolikany. Nzamb ukat kwitiy muntu mwawonsu ukatina kumwifukwil.’ Pita wayifundisha yom yivud piur pa Yesu. Spiritu utumbila wamushirikina Korney ni antu adingay nend, ni ayibatisha awonsu.

“Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.”—Midimu 10:35