Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 100

Paul ni Timote

Paul ni Timote

Timote wading mukadivar nsand wa mu chikumangen cha Listre. Tatukwend wading mwin Grek, ni makwend wading mwin Yuda. Makwend, Yunis, ni ngakend Loyis amufundisha Timote piur pa Yehova kudiosh padingay mwanikanch.

Payay Paul ku Listre mu weny wend wa kaad mu mudimu wa kulejan, wamana anch Timote wading uyikatin chakin akadivar ni wading ukatin kuyikwash. Paul wamutazuka Timote chakwel aya nend mu weny wend. Paul wamufumbang Timote chisu chawonsu chakwel ikal mwin kulejan ni mwin kufundish muwamp wa rusangu ruwamp.

Spiritu utumbila wamukwashang Paul ni Timote kwawonsu kwayangangau. Dichuku dimwing uchuku, Paul wamana mu chishimushimu muntu wamulej anch aya ku Masedon mulong ayikwash antu. Chawiy Paul, Timote, Silas ni Luka aya ku Masedon mulong wa kulejan ni kusal yikumangen.

Mu musumb wa Tesalonik mwi ngand ya Masedon, antu avud amband nau amakundj ikala in Kristu. Pakwez in Yuda amwing amwovila Paul ni arund nend mukau. Ayikwata ni kuyitwal kudi amakurump a musumb, ni kutoy anch: ‘Antu inay adi akankuny a mwant wa in Rom!’ Mwom wa Paul ni wa Timote yading mu ubaj, chawiy uchuku achinina mu Berey.

Antu a mu Berey asangera kutesh rusangu ruwamp chawiy in Grek nau in Yuda ikala in kwitiyij. Pakwez padiokalau in Yuda amwing ku Tesalonik ez ku Berey, aleta kanvundangesh, chawiy Paul wachinina ku Aten. Timote ni Silas ashala ku Berey mulong wa kuyikasikesh akadivar. Chisu chimwing, Paul wamutuma Timote ku Tesalonik mulong wa kuyikasikesh akadivar chakwel ajijamena  kuzengol kukash kwadinga kwinikwa. Kupwa, Paul wamutuma Timote mulong wa kutal ni kukasikesh yikumangen yivud.

Paul wamuleja Timote anch: ‘Awonsu akatina kumusadin Yehova akez kayizengol.’ Timote amuzengola ni amuteka mu rukan mulong wa ritiy rend. Pakwez wasangara mulong chading chisu cha kumekesh kushinshaman kwend kudi Yehova.

Paul wayileja antu a ku Filip anch: ‘Nakutuminanyay kal Timote. Ukukufundishany chirumburikina kwendin mu uyakin, ni ukukufumbany mu mudimu wa kulejan.’ Paul wading wij anch ufanyidin kumuchingejin Timote. Asala mudimu pamwing mudi arund ni asala mudimu pamwing mudi atushalapol a Nzamb mu mivu yivud.

“Kinikwetap muntu mukwau nichingejina mwin kutal ku yom ya mwom wenen mudi am amwinam. Antu awonsu akwau akat kutal ching kusu ku yom ya mwom wau ayinau, katadilap ku rusot ra Yesu Kristu, bwat.” —Filip 2:20, 21