Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 101

Amutwadin Paul ku Rom

Amutwadin Paul ku Rom

Weny wa kasatu wasalay Paul mu mudimu wa kulejan wapwila mu Yerusalem. Kwinikwa amukwata ni amuteka mu rukan. Uchuku mu chishimushimu Yesu wamuleja anch: ‘Ukuya ku Rom mulong wa kulejan rusangu ruwamp.’ Paul amudiosha ku Yerusalem amutwal ku Sezarey, kwinikwa wasala mivu yaad mu rukan. Pading pamuruburishinau kudi Nyikel Festus, Paul walonda anch: ‘Nlika anrumburish kudi Sezar, mu Rom.’ Festus wakula anch: “Ey wit kal dirumburish dia mwant wa in Rom, chawiy ukuya kwey kudi mwant wa in Rom.” Amuteka Paul mu waat chakwel amutwal ku Rom, chad akadivar nend in Kristu aad, Luka ni Aristarik, aya nend pamwing.

Padingau pa karung, kweza rinkind mukash, ni rinkind winou wasala machuku mavud. Antu awonsu atonga anch akufa. Pakwez Paul wayileja anch: ‘Mwangel wanlejang mu chilat anch: “Paul kangal wov wom! Chifanyidin ey kuya kwiman kurutu kwa mwant wa in Rom, ni antu awonsu udia nau mu waat akupand.” Ikasikeshany! Tukufanyap.’

Rinkind watuta mu machuku 14. Kupwa, divu diamekana. Diading ditung dia Malta. Waat wibula ku divu ni wabaroka, pakwez antu awonsu 276 ading mu waat apanda. Amwing isaya ni akwau akwata ku yibar ya waat ni apempama kupwa atuntuk. Antu a ku Malta ayisenda ayipepin kasu chakwel ota.

Kupwa kwa angond asatu, amasalay asenda waat ukwau amutwal Paul ku Rom. Pashikau, akadivar eza kumusankan. Payimanay, Paul wamujikitisha Yehova ni wikala ni usu. Ap anch Paul wading muntu wa rukan, amwitiyina kushakam mu chikumbu cha kufutin oku amulamin kudi isalay. Wasala mivu yaad mwinimwa. Antu ezang kumutal ni wayilejang piur pa Want wa Nzamb ni wayifundishang piur pa Yesu. Paul wafunda kand mikand mulong wa yikumangen ya mu Asia Mukemp ni mu Yudeya. Yehova wamusadina chakin kamu Paul mulong wa kupalangesh rusangu ruwamp ku michid.

“Pakwez mu yom yawonsu tukat kumekesh anch, tudi atushalapol a Nzamb, tukat kushimpish michim mu mar, mu yakamish, ni mu kuzengol.”—2 Korint 6:4