Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 99

Kalam wa Rukan Wilej kal Uyakin

Kalam wa Rukan Wilej kal Uyakin

Mwi ngand ya Filip mwading changadim umwing muswik wading ni chilembil. Chilembil winou wamukwashang changadim kubwak ni changadim winou wikala nich nfalang jivud ni wayipitisha ansalejend. Payangangay Paul ni Silas ku Filip, changadim winou wayilondulanga. Chilembil winou wamubachikang changadim winou kutoy anch: “Antu inay adi atushalapol a Nzamb Upandakena Piur pa yawonsu.” Kupwa Paul wamwela chilembil anch: ‘Mu dijin dia Yesu, mudiokala changadim winou!’ Chilembil wamudiokala changadim.

Pamanau ansalejend a changadim winou anch kakutwishap kand kwikal ni nfalang, ajimana nakash. Amukakalijana Paul ni Silas ayitwal kudi amakurump a musumb, alonda anch: ‘Antu inay ajipin yijil ni akat kurumbangesh musumb wetu!’ Amakurump a musumb apana mbil ja kumubul Paul ni Silas ni kuyitek mu rukan. Kalam wa rukan wayiteka mu kapalikany ka mukach kakweta mididim ni wayiteka makas ni mend mu mabay ma kufuril kupwa amapamp ni mbwambu.

Antu akwau a rukan atesha pading pawanginay Paul ni Silas miminy ya kumutumbish nich Yehova. Kukashimuk mukach mwa uchuku, divu diazala ni rukan rawonsu ranyikeka. Yis ya rukan yazurika ni miyolal yading yiyikasinau antu a rukan yasuburoka ni mabay mwayandjikau makas ni mend mazakoka. Kalam wa rukan waya mau mu kapalikany ka mukach ni watana yis yazurikang kal. Wamana anch antu a rukan awonsu achinang kal, chawiy wanona mpak yend ya musamun chakwel ijipa.

Mu chisu chinicha, Paul wamwela ni dizu dia piur anch: ‘Kangal wishesh amwiney! Etu awonsu tudi kwetu mwinomu!’ Kalam wa rukan waya mau ni wawa pansh kurutu kwa Paul ni Silas. Wayipula anch: “Nisala nchik chakwel nipanda?” Amwakula anch: ‘Ey ni antu a mu dijuku diey ufanyidinany kumwitiyij Yesu.’ Kupwa Paul ni Silas amufundisha kalam wa rukan ni dijuku diend dizu dia Yehova, ni ayibatisha.

“Pakwez kurutu kwa yom yiney akez katek bil makas padi en, ni kukumeshany mar ni kukupanany ku masinagog ni [kukutekan mujinkan], end akuletany kurutu kwa ant nau anyikel, mulong wa kwambat dijin diam. Chinech chikwikal chisu kudi en [cha kwikal ni uman]”—Luka 21:12, 13, TMK.