Pafay Yesu, mpich umwing utazukinau anch Josef wamwita Pilat chakwel adiosha mujimbu wa Yesu pa mutond. Josef wabwika mujimbu wa Yesu nich disun ni wamupana malash kupwa wamujika mwi nzay yisu. Wateka diyal dijim ku chis cha nzay. In kupesh ajim amuleja Pilat anch: ‘Tukwet wom mulong in kwilej amwing a Yesu akutwish kuya kudiosh mujimbu wend ni kulond anch wavumbukang kal.’ Chawiy Pilat wayileja anch: ‘Tekany chijingidij kwi nzay ni kuyilam.’

Kupwa kwa machuku masatu, pamanch nakash, amband amwing aya kwi nzay ni atana diyal diading kwi nzay adidioshang kal. Mwangel wading mukach mwa nzay wayileja amband inay anch: ‘Kangal wovany wom. Yesu amuvumbulang kal. Yangany uyilejany in kwilejend anch akutanijan nend ku Galalia.’

Mariy Mandalen waya mau wamutan Pita ni Yohan. Wayileja anch: ‘Muntu kanang wasendang kal mujimbu wa Yesu!’ Pita ni Yohan aya mau kwi nzay. Pamanau anch mwi nzay mudi mwamwamu achirika ku yikumbu yau.

Pachirikay Mariy kwi nzay, wamana angel aad iminy mwi nzay ni wayileja anch: ‘Nijap kwamutwalangau kal Nsalejam.’ Kupwa wamana muntu, ni watonga anch muntu winou wading mwin kulam jinzay, chawiy chamwelay anch: ‘Nilemb amboku, nlejaku kwisu watwalangana kal mujimbu wa Yesu.’ Pakwez palonday muntu anch ‘Mariy,’ Mariy wijika anch muntu winou wading Yesu. Watoya anch: ‘Mulej!’ ni waseja kudiay ndiy. Yesu wamuleja anch: ‘Yang ni yileja in kwilejam anch waman kal.’ Kapamp kamwing, Mariy waya mau wayitan in kwilej ni wayilej anch namuman kal Yesu.

Kupwa dichuku diawiy dinidia, in kwilej aad ading adiokil ku Yerusalem ayil ku Emaus. Muntu umwing wayitana mwi njil ni wayipula piur pa yom yading yambambinau. Alonda anch: ‘Ov, kand kal uteshap? Machuku masatu masutina am, in kupesh ajim amujipin Yesu. Pakwez katat amband amwing alondin anch Yesu  udi mwom!’ Muntu winou wayipula anch: ‘En uyitiyijinanyap kwen aprofet? Amwakula anch Kristu wafanyina kufa ni kupwa wavumbuk.’ Ndiy wadandamena kuyirumburil Mifund. Pashikau ku Emaus, in kwilej amuleja muntu winou kushakam nau. Kurutu kwa kudia, muntu winou walembila, chawiy, ijika kapamp kamwing anch wading Yesu. Kupwa wayishadika.

In kwilej aad achirika mau ku Yerusalem mu chikumbu mwadingau atwimbuy ni ayileja yom yamanau kal. Padingau mukach mwa chikumbu, Yesu wayibudikina awonsu. Chakusambish, atwimbuy kitiyijap anch wading Yesu. Kupwa wayileja anch: ‘Talany bil makas mam; nkwatanyaku. Mulong achifunda anch Kristu ukez kavumbuk mukach mwa afu.’

‘Am yam njil ni uyakin ni mwom; Kwikil muntu ukutwisha kwiyil kwa Tatuku ching wasutil kudi am.’—Yohan 14:6