Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 92

Yesu Wayimeken kal Ayibind a Ansh

Yesu Wayimeken kal Ayibind a Ansh

Chisu chikemp chasuta kupwa kwa Yesu kuyimeken atwimbuy, Pita wakwata mupak wa kuya ku Karung ka Galalia kuta ansh. Tomas, Jakobu, Yohan, ni in kwilej akwau aya nend. Ata ansh uchuku wa kabuj pakwez kakwatap insh ap umwing.

Kushik pamanch, amana muntu wimanang kal ku chikum. Wayipula antu ading atila ansh anch: ‘Wakwatanganap kal insh?’ Amuleja anch: “Bwat!” Muntu winou walonda anch: “Tangany wand wen mutambu wa katatuku wa waat.” Pasalau mwamu, wand wizula ni ansh avud ni katwishap kuutek mu waat. Yohan wijika anch muntu winou wading Yesu ni walonda anch: “Komb, Nsalejetu!” Kapamp kamwing, Pita wamatikina mu mem ni wasambisha kwisay chakwel aya ku chikum. In kwilej akwau alondula mu waat.

 Pashikau ku chikum, amana muntu winou ukat kwosh mukat ni insh. Yesu wayileja kulet ansh mulong awejin pa yakudia yiney. Kupwa walonda anch: ‘Ezany udiany.’

Papwishau kudia, Yesu wamwipula Pita anch: ‘Winkatin nakash kusutamu kuta ansh?’ Pita wamwakula anch: ‘Mwaning Nsalejam, wij anch nikukatin.’ Yesu wamuleja anch: ‘Dish amikoku am.’ Yesu wamwipula kand anch: ‘Pita winkatin?’ Pita wakula anch: ‘Nsalejam wij anch nikukatin.’ Yesu wamuleja anch: “Lam amikoku am [akemp].” Yesu wamwipula kapamp ka kasatu. Pita wova ushon nakash, ni walonda anch: ‘Nsalejam, ey wij yom yawonsu. Wij anch nikukatin.’ Yesu wamwela anch: “Dish amikoku am [akemp].” Kupwa wamuleja Pita anch: ‘Dandamen kwinlondul.’

‘[Yesu] wayileja anch: Nlondulany, chad nikez kakwikadishany ayibind a antu. Pawiy kamu pinipa, awiy asha mand mau, aya nend.’—Mateu 4:19, 20