Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 93

Yesu Wachirik kal Mwiur

Yesu Wachirik kal Mwiur

Yesu wamanijana nau in kwilejend mu Galalia. Wayinkisha mbil ya usey nakash anch: ‘Yangany kudi antu a ngand yawonsu, yikadishany in kwilejam. Yifundishany yom yinakufundishanya ni yibatishany.’ Kupwa wayikana anch: ‘Ijikany anch nikwikal niyenen chisu chawonsu.’

Mu machuku 40 kupwa kwa kuvumbuk kwend, Yesu wayimekena yitot ya in kwilejend mu Galalia ni mu Yerusalem. Wayifundisha malejan ma usey ni wasala yilay yivud. Kupwa Yesu watanijana nau atwimbuy end kapamp kansudien ku Mukandu wa Mitond ya Mpach. Wayela anch: ‘Kangal wadiokalany mu Yerusalem. Dandamenany kuchingel yom yakanay Tatuku.’

Atwimbuy kovap kurumburik kwa yom yalonday Yesu. Amwipula anch: ‘Ukimbin katat kwikal Mwant wa Isarel?’ Yesu wakula anch: ‘Chawiyap chisu chatekay Yehova mulong wamam kwikal Mwant. Piswimp ap ukutambulany usu kusutin spiritu utumbila ni ukwikalany atuman am. Yangany ulejanany mu Yerusalem, Yudeya, Samaria, djat ni kusudedina mangand.’

Kupwa amuzambula Yesu mu madj ni madj mamubwika. In kwilejend adandamena kutal mwiur, pakwez wading wayang kal.

In kwilej adiokala ku Mukandu wa Mitond ya Mpach ni aya ku Yerusalem. Akumanganang yisu yivud mu kapalikany ka piur mulong wa kulembil. Ading achingedin Yesu ayinkish mbil jikwau.

“Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”—Mateu 24:14