Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 88

Yesu Amukwat Kal

Yesu Amukwat Kal

Yesu ni atwimbuy end asutina Mwi Nkurubuk ya Sederon mulong wa kuya ku Mukandu wa Mitond ya Mpach. Wading uchuku ni ngond wading uzazin. Pashikau mu chir cha Getiseman, Yesu wayileja anch: ‘Shakamany pinap ni chishany ku mes.’ Kupwa Yesu waya pakemp pakemp mu chir ni wasa manungin mend pansh. Wading ni ushon nakash pamulembilay Yehova anch: “El rusot rey risadika.” Chawiy, Yehova watuma mwangel mulong wa kuya kumukasikesh Yesu. Pachirikay Yesu, wayitana atwimbuy end asatu alalang kal. Wayileja anch: ‘Lankany! Chinech chidiap chisu cha kulal! Chisu chawanyin kal cha kwimpan mu makas ma akankuny nam.’

Pakad kulab Yudas washika pamwing ni yisak ya amasalay ading ni jimpak ja musamun. Yudas wading wij ndond ya kumutanin Yesu mulong ading ni chaku cha kuyang mu chir chinicha. Yudas wading wayilejang kal amasalay chijingidij cha kumumekesh nich Yesu. Waya kapamp kamwing kudiay Yesu wamwel anch: ‘Walank Mulej,’ ni wamubwikat. Yesu walonda anch: ‘Yudas wampan kal kusutil ku kwimbwikat?’

Yesu wimana kurutu kwa amasalay inay wayipul anch: “Nany ukimbinanya?” Amwakula anch: “Tumukimbin Yesu wa ku Nazaret.” Kupwa wayakula anch: “Yam unou,” amakundj inay awa pansh. Yesu wayipula kand anch: “Nany ukimbinanya?” Amwakula kand anch: “Tumukimbin Yesu wa ku Nazaret.” Yesu wayakula anch: ‘Nikulejinany anch yam unou. Likany antu inay aya kwau.’

Pamanay Pita yom yiney yashikena, wanona mpak yend ni wamukatula Malikus kashalapol wa mwin kupesh mujim ditu. Pakwez, Yesu wamwoka ditu diend. Kupwa wamuleja Pita anch: ‘Andjik mpak yey mu chindal. Anch warish ni mpak, niyey ukufa kwi mpak.’ Amasalay amukwata Yesu ni amukasa moj ku  makas, pinipa atwimbuy achina mau. Amasalay inay amutwala kudiay Anas ntakel wa in kupesh. Anas wamwipula Yesu ni wamutwala ku chikumbu cha Mwin Kupesh Mujim Kaifas. Yom ik yayishikena atwimbuy?

“Ukez kumanany mar mu mangand, pakwez jamishany! Am napandakan kal kuyip kwa mangand.”—Yohan 16:33