Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 87

Yakudia ya Nsudien ya Urel ya Yesu

Yakudia ya Nsudien ya Urel ya Yesu

In Yuda ading kusalang Musambu wa Pasak kapamp kamwing pa muvu pa dichuku dia 14 dia ngond wa Nisan. Musambu winou wayivurishang mutapu wayikwolau mu uswik mu Idjibit kudiay Yehova ni kuyitwal Mwi Ngand ya Kushilamu. Mu muvu wa 33 C.C., Yesu nau atwimbuy end asala Musambu wa Pasak mu kapalikany ka piur ka chikumbu chimwing chading mu Yerusalem. Kurutu apwisha kudia, Yesu wayileja anch: ‘Umwing wa pakach pen ukwitungun matung.’ Atwimbuy inana nakash ni amwipula Yesu anch: ‘Muntu winou nany?’ Yesu wakula anch: ‘Udi muntu nikwinkisha mukat.’ Kupwa wamwinkisha Yudas Isakariot chikunku cha mukat. Pakad kulab, Yudas wabudika pol waya.

Chawiy Yesu walembila kupwa waumbwola mukat mu tuyikunku ni wayinkisha atwimbuy end ashinshamena. Walonda anch: ‘Dangany mukat winou. Mukat winou ufanikeshin mujimbu wam, unikupana mulong wenen.’ Kupwa walembila kand mulong wa nviny ni wayinkisha atwimbuy end. Walonda kand anch: ‘Nangany nviny winou. Nviny winou ufanikeshin mash mam, makwichika mulong wa kulikishin yitil. Nakukanany kal anch ukwikalany ant pamwing ni yamam mwiur. Salany mwamu mulong wa kwinvurik am.’ In kwilej a Yesu adandamedining kusal mwamu kapamp kamwing pa muvu chisu cha urel. Kukumangan kwinoku akutazukining anch Musambu wa Yakudia ya Urel ya Mwant.

 Papwishau kudia, atwimbuy asambisha kutadikijan chakwel ijika nany udia wa usey nakash pakach pau. Pakwez, Yesu wayileja anch: ‘Muntu udia mujim nakash pakach pen ufanyidin kwiman amwinend mudi mwanikanch, wakad usey.’

‘En udan arund nam. Nakulejany kal yom yawonsu yanlejay Tatuku kukulejany. Piswimp ap nikuya kudi Tatukwam mwiur. Ukushalany chakwel antu akwijik anch udan in kwilej am anch wamekeshany rukat umwing ni mukwau. Ufanyidinany kukatijan umwing ni mukwau mudi munakukatanya en.’

Kupwa, Yesu wamulembila Yehova chakwel ayilama in kwilej end awonsu. Wamwita Yehova chakwel ayikwasha asalang mudimu pamwing mu chisambu. Walembila chakwel dijin dia Yehova aditumbisha. Chawiy, Yesu ni atwimbuy end awanga miminy mulong wa kumutumbish Yehova kupwa abudika aya. Chisu chading chisejin piswimp cha kumukwat Yesu.

“Kangal wovany wom, en kachisak ka amikoku, mulong chinech chimusangareshin Tatukwen kukwinkishany en Want.” —Luka 12:32, TMK.