Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 89

Pita Umwitunin Yesu

Pita Umwitunin Yesu

Padingay Yesu nau atwimbuy end mu kapalikany ka piur, wayileja anch: ‘Uchuku winou en awonsu ukwinchinany.’ Pita wakula anch: ‘Am kinikukuchinap! Ap anch akwetu awonsu akuchin am nikutwishap kusal mwamu.’ Pakwez, Yesu wamuleja Pita anch: ‘Kurutu nzol ndemb atenda ey ukwintun tupamp tusatu.’

Chisu chamukwatau Yesu chakwel amutwala ku chikumbu cha Kaifas, atwimbuy end amwing achina. Pakwez, atwimbuy aad alondula mu yisak ya antu. Pakach pa atwimbuy inay aad Pita nindiy wadingap. Waya mu chipang cha Kaifas ni wading wotin kasu. Kashalapol umwing mband wamumana Pita ukat kwot kasu ni wamwela anch: ‘Nikwij! Wading pamwing ni Yesu!’

Pita wakula anch: ‘Bwat kinadingap nend! Kinijap kwam yom yiulondina!’ Watumbuka waya wiman ku chis cha chipang. Kupwa kashalapol mukwau mband wamumana ni wayileja antu anch: ‘Muntu winou wading mwin kwilej wa Yesu!’ Pita wakula anch: ‘Kinimwijap kwam Yesu!’ Muntu mukwau walonda niyend anch: ‘Niyey udi umwing wa antu inay! Kulond kwey kwoviken kamu anch udi mwin Galalia mudi mudiay Yesu.’ Pakwez, Pita wachipa anch: ‘Kinimwijap kwam!’

Pa chisu chinicha, nzol ndemb watenda. Pita wamumana Yesu wakarumuk wamutalaku. Pita wavurika mazu malonday Yesu kupwa wabudika pol ni wasambisha kudil nakash.

Mu chisu chikemp, in Sanedrin ovijana chakwel amufisha nich Yesu padingay mu chikumbu cha Kaifas. Ading akwatang kal mupak wa kumujip Yesu ni ading akimbin diyingishin dia kumujipin. Pakwez, katanap chom chiyimp chasalay. Kupwa Kaifas, wamwipula Yesu anch: ‘Ov, udi Mwan a Nzamb?’ Yesu wakula anch: ‘Mwawiy yam kamu. Kaifas walonda anch: Tukwetap kand kuswir kwa uman ukwau. Minam madi masaal!’ Antu awonsu ading mu chipang  alonda anch: ‘Muntu winou afanyidin kamu kumujip.’ Asambisha kumuchil Yesu mat, amukasa chibel pa mes, amubula yinkany ni amwela anch: ‘Anch udi muprofet, bwak muntu wakubula kal!’

Pikwacha amutwala kand Yesu mu chipang cha in Sanedrin ni amwipula kand anch: ‘Ov, udi Mwan a Nzamb?’ Yesu wayakula anch: ‘Yey ulondina mwamu.’ Amufisha nich kupwa amutwala kand mu chipang cha Pons Pilat mwant wa in Rom. Yom ik yikwau yasadika dichuku dikwau? El tujingunina yom yiney mu shapitre mukwau.

“Chisu chikat kwez, chikez kukupalangeshanyau, muntu ni muntu waya kwol kwend. Chad am nikez kushal amwinam, pakwez kinidiap kusu amwinam, mulong Tatuku udi ni yamam.”—Yohan 16:32