Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 86

Yesu Umuvumbwil Lazar

Yesu Umuvumbwil Lazar

Yesu wading nau arund nend a piswimp asatu ading ku Betaniy. Arund inay ading Lazar ni ampanyend aad, Mariy ni Mart. Dichuku dimwing, padingay Yesu ushad wa Wit wa Yordan, Mariy ni Mart amutumina mazu anch: ‘Lazar uyedin nakash. Ez amboku pakad kulab!’ Pakwez, Yesu kayap kapamp kamwing. Wasala machuku maad kupwa wayileja in kwilej end anch: ‘Ez tuyany ku Betaniy. Lazar ulel, chawiy niyil chakwel nimulangwisha.’ Atwimbuy amwakula anch: ‘Ang Lazar ulela, chawiy chikumukwasha ayerika.’ Chad Yesu wayileja patok anch: ‘Lazar wafang kal.’

Pashikay Yesu ku Betaniy, Lazar ading amujikang kal pasutin kal machuku manying. Antu avud ezang kumwongoj Mariy ni Mart. Pateshay Mart anch Yesu, ukat kwez, ndiy waya mau chakwel amusankana. Mart wamuleja Yesu anch: “Nsalejam anch wading kunoku, ing mwanamakwam kafangap.” Yesu wamwakula anch: ‘Mwanamakwey ukwikal kand mwom. Ov, Mart witiyijin mazu minam?’ Wakula anch: ‘Nitiyijin anch ukuvumbuk pa dichuku dia divumbuk.’ Yesu wamwakula anch: “Yam divumbuk ni mwom.”

Chawiy, Mart waya kudiay Mariy ni wamuleja anch: ‘Yesu wez kal.’ Mariy waya mau kudi Yesu kupwa yisak ya antu yamulondula. Wawa pansh ni wadandamena kudil. Walonda anch: ‘Nsalejam anch wading kunoku, ing mwanamakwam kafangap!’ Yesu wova ushon wovay Mariy, chawiy niyend wasambisha kudil. Antu pamanau anch Yesu ukat kudil, alonda anch: ‘Komb Yesu wading umukatin Lazar.’ Pakwez, antu akwau ashimoka ni alonda anch: ‘Mulong wak kamupandishangap murund nend?’ Yom ik yasalay Yesu?

Yesu waya kwi nzay kwapatau nich diyal dijim nakash. Wapana mbil anch: ‘Dioshany diyal.’ Mart wakula anch: ‘Pakwez, wafil pasut kal machuku manying! Mujimb wend wasambishang kal kuvund.’ Pakwez, antu adiosha diyal dined kupwa Yesu walembila anch: ‘Tatuku nikujikitishin mulong winteshin. Nij anch winteshining yisu yawonsu, pakwez, nilondin nich dizu dia piur mulong antu inay ijika anch yeya wantuma.’ Kupwa watazuka nich dizu dia piur anch:  “Lazar budik!” Chom chimwing chishimokishina chasadika: Lazar wabudika mwi nzay ni masun mamuvungau pamujikau. Yesu walonda anch: “Musurilany ni mulikany aya kwend.”

Antu avud amana chilay chinech ateka ritiy rau mudiay Yesu. Pakwez antu amwing amana yom yiney aya kuyilej Afaris. Kusambish pinipa, Afaris akimba mutapu wa kumujip Lazar pamwing ni Yesu. Yudas Isakariot umwing wa pakach pa atwimbuy 12, waya ku ujindj kudi Afaris ni wayipula anch: ‘Anch nakulejany mutapu wa kumukwat Yesu ukwinfutan nfalang jinch?’ Itiya kumufut nfalang 30 ja utad wa argent chawiy Yudas wasambisha kukimb mitapu ya kumupan Yesu mu makas ma Afaris.

‘Nzamb wakin udi Nzamb wetu ukata kutupandish; Yehova Nsalejetu ukat kutukamunin mu rufu.’—Kuseng 68:20