Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 78

Yesu Ulejen Rusangu ra Want

Yesu Ulejen Rusangu ra Want

Machuku makemp kupwa kwa kumubatish, Yesu wasambisha kulejan anch: ‘Want wa Nzamb udi piswimp.’ In kwilej end aya nend pamwing mu Galalia ni mu Yudeya. Pachirikay Yesu ku Nazaret, waya ku sinagog mulong wa kutang muvungur wa Isay, wautanga nich dizu dia piur anch: ‘Yehova wanginkishin kal spiritu wend utumbila mulong nilejana rusangu ruwamp.’ Mazu minam marumburikin ik? Marumburikin anch, ap anch antu akimba kuman yilay yivud yasalay Yesu, pakwez, chitongijok chend cha kusambish chatambwilay spiritu utumbila chading cha kulejan rusangu ruwamp. Chawiy chayilejay antu eza kumutesh anch: ‘Nlel unou uprofet winou wawanyin kal.’

Dichuku dikwau, Yesu waya ku Karung wa Galalia, kwawiy kwatanay in kwilej anying ading ayibind a ansh. Wayileja anch: ‘Nlondulany, nikukwikadishany ayibind a antu.’ In kwilej inay ading Pita, Andare, Jakobu ni Yohan. Alika kapamp kamwing mudimu wau wa kuta ansh ni amulondula. Awonsu aya mu Galalia mulong wa kulejan rusangu ra Want wa Yehova. Alejana mu ma sinagog, mu sok ni mu mabalibal. Chisak cha antu chayilondula ndond yawonsu yayangau. Rusangu piur pa Yesu rapalangana ndond yawonsu kushik ni ku Siria.

Pa chisu chimwing, Yesu wayinkisha in kwilej end amwing usu wa kwok ayej ni wa kwopat ayilembil. Akwau aya nend pamwing mu mudimu wa kulejan wa musumb ni musumb ni ul ni ul. Amband amwing ashinshamena mudi Mariy Mandalen, Yoan, Suzan ni amband akwau avud awanyisha maswir ma Yesu ni ma in kwilej end.

Kupwa kwa kuyifumb in kwilej end, Yesu wayituma mulong wa kuya kulejan. Pasambishau kulejan mu Galalia, antu avud ikala in kwilej ni ayibatisha. Chawiy, antu akwau avud akimba kwikal in kwilej a Yesu, chad Yesu wayifanikesha ni chir chaswila kal chidiau piswimp ni kwangul. Wayileja in kwilej end anch: ‘Mulembilany Yehova chakwel atuma in kwangul mbut avud.’ Watonda kand in kwilej 70 ni wayituma aad aad mulong wa kuya kulejan mu Yudeya  mwawonsu. In kwilej end ayileja antu a mitapu yawonsu piur pa Want. Pachirikau in kwilej kudiay Yesu, asangara nakash kumulej yom yamanau. Alonda anch ap Djabul katwishangap kutukangesh kusal mudimu wa kulejan.

Yesu wikala nich kashinsh anch in kwilej end akez kudandamen kusal mudimu winou wa usey anch wachirik mwiur. Wayileja anch: ‘Lejanany rusangu ruwamp pa mangand mawonsu. Yifundishany antu Dizu dia Nzamb ni yibatishany.’

“[Nifanyidin] kulejan rusangu ruwamp ra Want wa Nzamb mu mal makwau kand, mulong chawiy chantuminau.”—Luka 4:43, TMK.