Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 82

Yesu Uyifundishin In Kwilej End Mutapu wa Kulembil

Yesu Uyifundishin In Kwilej End Mutapu wa Kulembil

Yom yawonsu yasalangau Afaris yading kwau mulong wa kuyibaz kudi antu. Anch asal chom chimwing chiwamp, chom chinech afanyina kuchijik kudi antu akwau. Alembilanga pa jindond jadingau antu avud chakwel ayimana. Afaris alamanga mu manangu malembil malemp ni amachirikinanga mu ma sinagog ni mu mabalibal chakwel ayitesha kudi antu. Pakwez, antu ashimoka nakash payilejau kudi Yesu anch: ‘Kangal walembilany mudi Afaris. Atongining anch Nzamb ukuyitesh mulong wa mazu mau mavud malondinau, pakwez kimwawiyap. Malembil madi mambamb pakach pey ni Yehova. Kangal wachirikinany yom yimwing yimwing. Yehova ukatina umulejany yom yakin kamu yidia mu michim yen.’

 ‘Ufanyidinany kulembil mwamu: “Tatukwetu udia mwiur, dijin diey aditumbish. Want wey weza. Rusot rey risadika pansh mudi mwiur.”’ Yesu wayileja kand kulembil mulong wa yakudia ya pichuku pichuku, mulong wa dilikishin dia yitil yau ni milong yikwau yiyitadina.

Yesu walonda anch: ‘Dandamenany kulembil. Dandamenany kumwit Tatukwen Yehova, yom yiwamp. Nvaj mwawonsu ukat kumwinkish mwanend yom yiwamp. Anch mwan wakwit mukat, ov, ukumwinkish diyal? Anch wit insh, ov, ukumwinkish nnak?’

Kupwa Yesu warumburila malejan makusadin: ‘Anch wijany kupan yom yiwamp kudi anen, chawiy Tatukwen Yehova, ukupandakesh kukwinkishany spiritu utumbila. Yom yawonsu ufanyidinanya kusal ufanyidinany kumwit.’ Ulondwiling chiyul cha Yesu? Ufanyidin kulembil piur pa yom ik?

‘Dandamenany kwit akez kakwinkishany; dandamenany kukimb ukutanany; dandamenany kukokal akez kukwanzurilany.’—Mateu 7:7