Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 83

Yesu Udishin Tunan twa Antu

Yesu Udishin Tunan twa Antu

Piswimp ni kusal musambu wa Pasak mu muvu wa 32 C.C., atwimbuy adiokala mu mudimu wau wa kulejan. Ading aziyang kal, chawiy Yesu wandama nau mu waat mulong wa kuya ku Betsaida chakwel apima. Pakwez, pashikau piswimp ni ku chikum, Yesu wamana tunan twa antu twading tuyilondwil kwinikwa. Ap anch Yesu wakata anch ashala nau atwimbuy end, pakwez, ndiy wayitazuka antu inay mu mutapu uwamp. Wayoka ni wasambisha kuyifundish. Dichuku dia kabuj, Yesu wading uyifundishin yom piur pa Want wa Nzamb. Kushik urel, atwimbuy end eza kumulej anch: ‘Antu ovankal nzal. Yileja aya chakwel akimba yom yikudiau.’

Yesu wayakula anch: ‘Kakuyap. Yinkishany yakudia.’ Atwimbuy amwipula anch: ‘Ukimbin tuya tulanda mikat yifanyidinau kudia?’ Filip wakula anch: ‘Ap anch tukwet nfalang jivud tukutwishap kuland mikat yivud yiwanyidina kuyidish antu inay awonsu.’

Yesu wayipula anch: ‘Yakudia ik tukweta?’ Andare wakula anch: ‘Tukwet mikat yitan ni ansh aad. Yikepin nakash.’ Yesu wayileja anch: ‘Nletinany mikat ni ansh.’ Wayileja antu chakwel ashakama pa masuku mu yisak ya antu 50 ni yisak ya antu 100. Yesu wasenda mikat ni ansh kupwa watala mwiur ni walembila. Chawiy, wayinkisha atwimbuy yakudia mulong wa kuyangen antu. Amakundj awonsu 5 000 ni amband pamwing ni an adia ikut. Chad,  atwimbuy akumangeja yakudia yawonsu yashalaku, kwikil yakudia yasheshika. Yakudia yiney yakumangejau yizula too mu yimpay 12! Ov, chadingap chilay chishimokishina?

Antu asangara nakash ni akata anch Yesu ikala mwant wau. Pakwez, Yesu wading wij anch Yehova ndiy wija chisu chikezay kumutek kwikal mwant. Chawiy, wayileja yisak ya antu chakwel achirika ni wayileja kand atwimbuy end chakwel aya ushad ukwau wa Karung ka Galalia. Aya ni waat wau, kupwa Yesu wakandama pa mukandu amwinend. Mulong wak waya amwinend? Mulong wading ukwet kuswir kwa kumulembil Tatukwend. Ap anch wading ukwatiken nakash, pakwez, Yesu witekinang chisu cha kulembil.

‘Kangal wakimbany kusu yakudia yikata kuvund, pakwez kimbany yakudia yikata kulet mwom wa chikupu. Yiney yawiy yakudia yikupanay Mwan a Muntu.’—Yohan 6:27