Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 80

Yesu Utondin Atwimbuy Dikum ni Aad

Yesu Utondin Atwimbuy Dikum ni Aad

Kupwa kwa kusal mudimu wend wa kulejan mu muvu umwing ni chikunku Yesu wading ni mupak ujim wafanyinay kukwat. Nany wafanyinay kutond chakwel asala nend pamwing? Nany wafanyinay kufumb chakwel atakela chikumangen cha win Kristu? Chakwel atwisha kukwat mipak yiney, Yesu waswirikena wintakel wa Yehova. Chawiy, chayay ku mukandu amwinend mulong wa kulembil uchuku wa kabuj. Pikwacha, Yesu wayitazuka in kwilej end amwing ni watonda pakach pau atwimbuy 12. Ov, uvurikin majin mau? Majin mau mawiy manam: Pita, Andare, Jakobu, Yohan, Filip, Bartelemi, Tomas, Mateu, Jakobu mwan ikundj wa Alfe, Tadeu, Simon ni Yudas Isakariot.

Andare, Pita, Filip, Jakobu

Atwimbuy Dikum ni aad awiy aya nend mu weny pamwing. Kupwa kwa kuyifumb, ayituma kuya kulejan ayinau. Yehova wayinkisha usu wa kudiosh ayilembil ni wa kwok ayej.

Yohan, Mateu, Bartelemi, Tomas

Yesu wayitazuka atwimbuy Dikum ni aad anch arunend ni wayichingejina. Afaris afundishanga anch atwimbuy ading antu akad kwilej ni akad usey. Pakez, Yesu wayifumba mulong wa  kuwanyish mudimu wau. Asutisha chisu chilemp pamwing ni Yesu mu mudimu wa usey nakash, kushik ni kurutu kwa rufu rend ni pavumbukay. Mudi mwadingay Yesu, atwimbuy Dikum ni aad pakach pau adiokala mu Galalia. Amwing pakach pau ading aten kal.

Jakobu mwan ikundj wa Alfe, Yudas Isakariot, Tadeu, Simon

Atwimbuy ading antu akad kuwanyin ni arumbukanga. Yisu yimwing alondanga yom pakad kutong ni akwatang mipak yiyimp. Yisu yimwing akanganya kushimpish michim yau. Yisu yikwau kand apwitijanang pa yom yakad usey. Pakwez, ading antu awamp amukata Yehova. Awiy ikala dishin dia chikumangen cha win Kristu pachirikay Yesu mwiur.

‘Nikutazukinany anch arund nam, mulong nakulejany kal yom yawonsu yanlejay Tatukwam.’—Yohan 15:15