Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 77

Mband Umwing Udi ku Dijiy

Mband Umwing Udi ku Dijiy

Kupwa kwa musambu wa Pasak, Yesu ni in kwilej end asutina mu Samaria padingau nikuchirik ku Galalia. Piswimp ni musumb wa Sikar, Yesu wimana pa ndond yimwing yatazukangau anch dijiy dia Jakob. Padingay ni kupim, in kwilej end aya mu musumb mulong wa kuland yakudia.

Mband umwing weza ku dijiy dined mulong wa kuvit mem. Yesu wamuleja mband winou anch: “Nginkishaku amboku mem ma kuna.” Mband wamwakula anch: ‘Mulong wak winlondishina? Am nidi mwin Samaria. In Yuda kakatap kwambamb nau in Samaria.’ Yesu wamwakula anch: ‘Anch wading wingij ang nidi nany, oku yeya wakimbang kwingit mem ni nikukwinkish mem ma mwom.’ Mband wamwipula anch, ‘yom ik ukimbina kulond?, Ukwetap kwey mbekech.’ Yesu wamwakula anch: ‘Muntu mwawonsu ukeza kuna mem nikumwinkisha kakezap kand kwov impu.’ Mband wamwakula anch: “Mwant, nginkishaku amboku mem minam.”

Yesu wamwakula mband winou anch: ‘Yang umutazuk nfumwey weza nend kunoku.’ Mband wakula anch: ‘Kinikwetap kwam ikundj.’ Yesu wamuleja anch: ‘Ey ulondin kwey uyakin. Akwatin kal tupamp tutan, ni ikundj udia nend katat kadiap kwend nfumwey.’ Mband wakula anch: ‘Naman kal anch ey udi muprofet. Antu avud akat kwitiyij anch tukutwish kumwifukwil Nzamb pa mukandu winou, pakwez, in Yuda akat kulond anch chifanyidin kumwifukwil Nzamb ching ku Yerusalem. Nitiyijin anch, ang Mesia wez, ndiy ukutuleja mutapu tufanyidina kumwifukwil Nzamb.’ Kupwa Yesu wamuleja mband winou yom yalikay kuyilej antu akwau anch: ‘Yam Mesia.’

 Mband winou wachirika mau mu musumb ni wayileja in Samaria anch: ‘Nitongin anch namutan kal Mesia. Muntu winou wij yom yawonsu piur pam. Ez tuyany tumutalany!’ In Samaria amulondula mband winou ku dijiy chakwel atesha malejan ma Yesu.

In Samaria amutazuka Yesu chakwel eza ashakama mu musamb wau. Mu machuku maad, Yesu wayifundisha antu mu musumb winiwa ni antu avud ateka ritiy rau mudiay ndiy. In Samaria amuleja mband winou anch: ‘Kupwa kwa kumutesh muntu winou, twijik kal chakin anch ndiy udi mupandish wa mangand.’

“‘Eza!’ Muntu mwawonsu wovila impu eza. Chifanyidin muntu mwawonsu ukatila mem ma mwom eza, amatambul mamwamu wakad kuland.”—Kujingunik 22:17