Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 81

Malejan ma pa Mukandu

Malejan ma pa Mukandu

Kupwa kwa kuyitond atwimbuy 12, Yesu washirika pa mukandu ni waya ndond yading yikumangena yisak ya antu. Antu inay adiokala ku Galalia, ku Yudeya, ku Tir, ku Sidon, ku Siria ni mutambu ukwau wa Yordan. Eza ni antu amwing ading ayedina ni akwau adinga nau ayilembil. Yesu wayoka antu inay awonsu. Kupwa Yesu washakama pa mukandu ni wasambisha kufundish. Warumburila yom yitufanyidina kusal mulong wa kwikal arund a Nzamb. Tufanyidin kumwijik Yehova ni kumukat. Pakwez, chikasiken kumukat Nzamb anch tuyikatinap antu akwau. Tufanyidin kwikal antu awamp ni kuyikat antu awonsu ap akankuny netu.

Yesu walonda anch: ‘Chifanyidinap kuyikat ching arund ney. Ufanyidin kand kuyikat akankuny ney ni kuyilikishin antu ni muchim wey wawonsu. Anch muntu kanang wakurumbukin ap wamurumbukin, yang mu mutapu uwamp chakwel umwita dilikishin. Yisadina antu akwau mu mutapu ukatina anch niyey akusadin mwamu.’

 Yesu wayibabesha kand antu piur pa yom ya kumujimbu. Wayileja anch: ‘Chidi cha usey kwikal murund wa Yehova pa ndond pa kwikal ni nfalang jivud. Mwij ukutwish kwiy nfalang jey pakwez, kakutwishap kwiy urund wey wa piswimp ni Yehova. Kangal wiyakamishany piur pa yom ukudianya, ukunanya ap masun ukudjalanya. Talany atujil. Nzamb ukat kuyinkish yisu yawonsu yakudia. Kwinan kukutwishap kuwejin machuku ku mwom wa muntu. Vurikany anch Yehova wij maswir men.’

Antu inay ading kand kal ateshap muntu ulondina mudi mwalonday Yesu. Antakel au a marelijon kayifundishap yom ya mutapu mudi winou. Mulong wak Yesu wading mulej mujim? Mulong yom yawonsu yafundishangay yadiokala kudi Yehova.

‘Itwikany mutond wam ni ilejinany kudi am, mulong am nishimpishin muchim ni kwitudish, chad mwamu mipim yen yikwiswedish.’—Mateu 11:29