Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 84

Yesu Wendin pa Mem

Yesu Wendin pa Mem

Yesu kayokap ching kusu ayej ap kuyivumbul afu, pakwez wading kand ni usu wa kuninetish rinkind ap ruval. Papwishay kulembil ku mukandu, Yesu wamana rinkind mukash ukat kutut mu Karung ka Galalia. Atwimbuy end ading mu waat padinga ni kutut rinkind winou mukash. Yesu washirika ku mukandu ni wasambisha kwendin pa mem ni waya ku mutambu wadinga waat. Pamanau atwimbuy muntu kanang ukat kwend pa mem, ova wom nakash. Pakwez, Yesu wayileja anch: ‘Yama. Kangal wovany wom.’

Pita walonda anch: ‘Nsalejam yeya kamu, nleja niyam neza kudi ey.’ Yesu wamuleja Pita anch: ‘Ez kwey.’ Chawiy, padinga ni kutut rinkind, Pita washirika mu waat ni wasambisha kwendin pa mem chakwel aya kudiay Yesu. Padingay ni kusej piswimp ni Yesu, Pita washinshikina nakash pa rinkind wadinga ututina, wova wom nakash ni wasambisha kujiy. Pita watoya anch: ‘Nsalejam mpandisha!’ Yesu wamukwata ku chikas ni wamwela anch: ‘Mulong wak widjidjekina? Ritiy rey ridi kwisu?’

Yesu ni Pita andama mu waat, kapamp kamwing rinkind waduta. Ukutwish kutong mutapu wiyovau atwimbuy? Alonda anch: “Chakin kamu ey udi Mwan a Nzamb.”

Kadiap kapamp ka kusambish kudi Yesu kakuninetish rinkind mukash mudi winou. Chisu chikwau, Yesu ni atwimbuy end ading akat kwauk pa karung, chad Yesu wading ulel tul mu waat. Padingay Yesu ulel, rinkind mukwau watuta nakash kand. Mambek makash mabula ku waat ni makimba kujiyish waat. Atwimbuy amulangwisha Yesu ni asambisha kudil anch: ‘Mulej tukimbin kufa! Tukwasha!’ Yesu walanka pa tul ni wamel mambek anch: “Ikuchika kamu kwey zoong!” Pakad kulab rinkind ni mambek madinga ni kutut pa karung maduta. Yesu wayipula atwimbuy end anch: ‘Ritiy ren ridi kwisu?’ Atwimbuy anunganijana anch: ‘Muntu winou amuziyidin ap kudi rinkind ni mambek.’ Atwimbuy ashikena ku kwijik anch, ang amuchingejin kamu Yesu, kakutwishap kwov wom wa chom ap chimwing.

‘Kwawonsu nikutwisha kwikal anch nikwetap ritiy nikutwishap kuman kuwap kwa Yehova mwi ngand ya aom!’—Kuseng 27:13