Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 85

Yesu Woken pa Dichuku dia Sabat

Yesu Woken pa Dichuku dia Sabat

Afaris amukisa Yesu ni ading akimbin mitapu kanang ya kumukwatin. Alonda anch kafanyidinap kwok antu pa dichuku dia Sabat. Pa dichuku dia Sabat, Yesu wamumana mput a mes mwi njil ukat kwit yom. Wayileja in kwilej end anch: ‘El umanany usu wa Nzamb mutapu ukimbina kumukwash muntu winou.’ Yesu wasampa divu ni mat mend, kupwa wamupana mput a mes winou pa mes mend. Yesu wamuleja anch: ‘Yang ku dijiy dia Silowe wowala mu mes.’ Chad mput a mes waya kwowal ni wamana kapamp ka kusambish mu mwom wend.

Antu ashimoka, ni alonda anch: ‘Ov, kindiyap muntu wading ushicha ku balibal mulong wa kwit, ufaniken kamu nend?’ Muntu winou wakula anch: ‘Navadika mput a mes!’ Antu amwipul anch: ‘Mutapu ik washikenanga ku kuman?’ Payilejau yom yamushikenang, antu inay amutwala kudi Afaris.

Muntu winou wayileja Afaris anch: ‘Yesu wasampang divu ni mat mend, kupwa wampanang pa mes ni wanlejang kuya kowal. Nasalang yom yanlejangay, katat nimen.’ Afaris amuleja anch: ‘Anch Yesu wokanang pa dichuku dia Sabat, komb usu wend udiokilap kudiay Nzamb.’ Pakwez, antu akwau alonda anch: ‘Anch usu wend kiudiokilap kudi Nzamb, kakutwishap kwok mayej mawonsu.’

Afaris ayitazuka anvaj a muntu winou ni ayipula anch: ‘Mutapu ik washikenangay mwanen kuman?’ Anvaj end ova wom nakash,  mulong Afaris alonda anch muntu mwawonsu ukuteka ritiy mudiay Yesu afanyidin kumwopat mu sinagog. Chawiy alonda anch: ‘Twijap kwetu. Mwipulany amwinend.’ Afaris amwipula muntu winou yipul yivud nakash chawiy muntu winou wayakula anch: ‘Nakulejany kal yom yawonsu yinija. Ov, mulong wak udandamedinanya kwingipul?’ Afaris ajimana nakash ni amubudisha pol.

Yesu waya kumuman muntu winou ni wamwipula anch: ‘Ov, utekin ritiy rey mudiay Mesia?’ Muntu winou wakula anch: ‘Nikutwish kutek ritiy mudiay ndiy ching anch nijik anch muntu winou udi nany.’ Yesu wakula anch: ‘Yama Mesia.’ Yesu wading muntu wa mutapu ik? Kayokap antu kusu pakwez, wayikwasha kand kwikal ni ritiy.

“En urumbukinany! Chidi mulong kiwijanyap Mukand wa Nzamb ap ukash wend.”—Mateu 22:29