Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 68

Elizabet Waval kal Mwan

Elizabet Waval kal Mwan

Mivu 400 ni kusut kupwa kwa kutungiril mbumbu ja Yerusalem, kwading mwin kupesh umwing dijin diend Zakariy ni mukajend Elizabet ading ashich piswimp ni musumb winou. Ading atijadin kal pasutin kal mivu yivud, pakwez kadingap ni mwan ap umwing. Dichuku dimwing padingay Zakariy ukat kwosh malash mu tempel, mwangel Gaburiel wamubudikina. Zakariy wova wom nakash, pakwez, Gaburiel wamuleja anch: ‘Kangal wov wom. Nikuletidin rusangu ruwamp ridiokila kudi Yehova. Mukajey, Elizabet, ukuval mwan ikundj, ukez kumupil anch Yohan. Yehova wamutonda Yohan mulong wa kusal mudimu wa pakampwil.’ Zakariy wamwipula anch: ‘Mutapu ik nikutwisha kwitiy yom yiney? Mulong am ni mukajam tudi kwetu amapal, tukutwishap kuval.’ Gaburiel wamwakula anch: ‘Antumang kudi Nzamb mulong wa kukulej rusangu ruwamp riner. Pakwez, mulong kiwitiyinap kwey mazu mam, ukwikal kamam djat ni pakuvadikinay mwan.’

Zakariy wimana chisu chilemp mu tempel pakad kusal chom. Chawiy, pabudikay pol, antu ading achingedin chakwel ijika yom yasadika kal. Zakariy wikala kamam. Wasambisha ching kwilok miny. Kupwa, antu ijika anch Zakariy watambul kal rusangu ridiokila kudi Nzamb.

Kwasuta chisu, Elizabet wimisha, kupwa wavala mwan ikundj mudi mwalonday kamu mwangel. Arund nend ni anamakwend eza kumutal mwan. Asangara nakash. Elizabet walonda anch: ‘Dijin diend Yohan.’ Awiy amwakula anch: ‘Kwikil muntu ap umwing wa mu dijuku dien ukweta dijin dia Yohan. Mupila dijin dia tatukwend Zakariy.’ Pakwez, Zakariy wafunda anch: ‘Dijin diend Yohan.’ Pa chisu chinicha Zakariy wasambisha kand kulond! Rusangu ra kuvadik kwa mwan winou rapalangana mwi ngand ya Yudeya mwawonsu ni antu asambisha kwiyipul anch: ‘Mwan winou anch wapam ukwikal mutapu ik?’

Kupwa, Zakariy wizula nich spiritu utumbila. Wasambisha kubwak anch: ‘El Yehova atumba.  Wamushilamu Aburaham anch Ukez katum mupandish, Mesia mulong wa kutupandish. Yohan ukwikal muprofet ni ukez kwijikish kwez kwa Mesia.’

Chom chikwau chishimokishina chamushikena Mariy mwanamakwend a Elizabet. El tushinshikinany rusangu riner mu shapitre ulondwilaku ou.

“Chinech chikasiken kudi antu, pakwez, kudi Nzamb yom yawonsu [yikasikenap].”—Mateu 19:26,TMK.