Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 73

Yohan Urijekin Kwez kwa Yesu

Yohan Urijekin Kwez kwa Yesu

Yohan mwan ikundj wa Zakariy ni Elizabet wikala muprofet papamay. Yehova wamusadina Yohan chakwel ayileja antu anch Mesia ukwez. Yohan kafundishap mu masinagog ap mu misumb yijim, pakwez wafundisha mwi mpay. Antu adiokala mu Yerusalem ni mu Yudeya, eza kutesh yom yalondangay Yohan. Wayifundisha antu inay anch chakwel amusangaresha Nzamb, afanyidin kulik kusal yom yiyimp. Antu avud pamuteshau Yohan, akarumuka ni alika kusal yitil, kupwa Yohan wayibatisha mu Wit wa Yordan.

Yohan kadingap mpich. Wadjalang masun masalau nich mavuj ma kamel ni wadiangang ampasu ni woch. Antu avud ashimwoka nakash piur pa yom yalondangay Yohan. Ap Afaris nau Asadus in kwitutul eza niyawiy kumutesh Yohan. Yohan wayileja anch: ‘Ufanyidinany kuswimp yaku yen ni kukarumuk ku yitil. Kangal watongany anch udiany antu a usey nakash mulong udiany antu a mu muchid wa Aburaham. Chinech chirumburikinap anch udiany an a Nzamb.’

Antu avud eza kumwipul Yohan anch: ‘Yom ik tufanyidina kusal chakwel tumusangaresha Nzamb?’ Yohan wayileja in Yuda anch: ‘Anch ukwet atubwik aad, ufanyidin kupan umwing kudi muntu uburedina.’ Wij kurumburik kwa mazu minam? Yohan wakimba in kwilej end ijika anch, chakwel amusangaresha Nzamb, afanyidin kuyikat antu akwau.

Yohan wayileja in kulambwish yitad anch: ‘Ikalany in kashinsh ni kangal wayiyany antu.’ Wayileja kand amasalay anch: ‘Kangal witiyany akukatulany milamu ap kulond makasu.’

 In kupesh ni in Levi eza niyawiy kumwipul Yohan anch: ‘Ey udi nany? Antu awonsu akimbin ijika.’ Yohan wayakula anch: ‘Am nidi mwin komb rubil mwi mpay mulong wa kuyikwash antu amwijika Yehova mudi mwalonday Isay.’

Antu akata nakash yom yayifundishau kudi Yohan. Antu avud atonga pamwing ap anch Yohan wading Mesia. Pakwez, ndiy wayileja anch: ‘Muntu wimpandakenamu ukwez. Pakwez, am kinidiap muwamp uwanyidina mulong wa kusubul moj ya ma sandal mend. Am nikat kubatish nich mem, pakwez, ndiy ukubatish nich spiritu utumbila.’

“Ndiy wading kaman weza mulong wa kuyilej antu rusangu ra chimunyik, chakwel antu awonsu amwitiyija Yesu mulong wa uman wend.”—Yohan 1:7