Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 71

Yehova Wamukinga Yesu

Yehova Wamukinga Yesu

Kwingangel kwa Isarel kwadinga antu adinga itiyijina anch atutumbu akutwish kuyitwal kwi ndond kanang. Dichuku dimwing uchuku, antu amwing a Kwingangel amana chom mudi katumbu uzazina ukat kushemunik mu madj, ni asambisha kumulondul. Pamulondulau “katumbu” winou, wayishikija mu Yerusalem. Antu inay ayipula antu amwing anch: ‘Kwisu kwavadikinay mwan ukeza kwikal mwant wa in Yuda? Twez kal mulong wa kumwifukwil.’

Pateshay mwant Herod wa mu Yerusalem jinsangu piur pa mwant musu, wakama nakash. Wayitazuka in kupesh ni wayipula anch: ‘Kwisu kwavadikinay mwan ulondinau anch ukez kwikal mwant?’ Awiy amwakula anch: ‘Aprofet alonda anch ukuvadikin mu Betlehem.’ Chawiy, Herod wayitazuka antu adiokala Kwingangel ni wayileja anch: ‘Yangany ku Betlehem umukimban mwan winou. Kupwa, ukuchirikany chakwel winlejany kudiay. Mulong niyam nikuya kumwifukwil.’ Pakwez, wadimbana.

“Katumbu” wasambisha kand kuya. Amakundj inay amulondula kand kushik ni ku Betlehem. “Katumbu” winou waya wiman piur pa chikumbu ni amakundj amulondula andama mu chikumbu. Amutana Yesu pamwing ni makwend Mariy. Amwifukwila mwan winou ni amwinkisha yipan ya utad wa or, diseng dia malash ni mira. Ov, Yehova, ndiy wayituma amakundj inay? Bwat.

Uchuku winiwa Yehova wamuleja Josef mu chilat anch: ‘Herod ukimbin kumujip Yesu. Tumbuk ey, mukajey ni mwan uchinyinany mwin ngand ya Idjibit. Ukushakamany mwinimwa djat ni pinikeza kukulejan kudiokalamu.’ Pakad kulab, Josef ni dijuku diend aya mu Idjibit.

Yehova wayileja antu adiokala Kwingangel anch kafanyidinap kuchirik kand kudiay Herod. Pijikay Herod anch antu inay kachirikinap kumuman, wajimana nakash. Mulong Herod kijikap ndond yadingay Yesu, chawiy, wakwata mupak anch an awonsu amakundj avadika pa chisu chinicha mu Betlehem afanyidin kuyijip. Pakwez, Yesu ading amuchinishinang kal kulemp nakash mu Idjibit.

 Pafay Herod, Yehova wamuleja Josef anch: ‘Katat chawiy chisu chenen cha kuchirik.’ Josef, Mariy ni Yesu achirika mu Isarel aya kushakam mu musumb wa Nazaret.

“Mwamu mukeza kikal kand mazu mam. . . , makez kasal yom yawonsu mudi munalonda.” —Isay 55:11