Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 69

Gaburiel Uyil Kumutal Mariy

Gaburiel Uyil Kumutal Mariy

Elizabet wading ni mwanamakwend changadim dijin diend Mariy, wading ushicha mu musumb wa Nazaret mwi ngand ya Galalia. Mariy ading amutondin kal kudiay Josef mwin kusong mabay. Pawanisha madikaj ma Elizabet angond musamban, mwangel Gaburiel wamubudikina Mariy. Wamwela anch: ‘Walank, Mariy. Yehova wakuyukish kal.’ Mariy kateshap kurumburik kwa mazu minam. Gaburiel wamuleja kand anch: ‘Ukwimish ni ukuval mwan ikundj ni ukez kumupil anch Yesu. Ndiy ukez kwikal Mwant. Want wend ukez kikal wa chikupu.’

Mariy wakula anch: ‘Am nidi kwam mujik. Mutapu ik nikutwisha kuval?’ Gaburiel wamuleja anch: ‘Kudi Yehova yom yawonsu yikasikenap. Spiritu utumbila ukwikal niyey ni ukuval mwan ikundj. Mwanamakwey Elizabet niyend wimishin kal.’ Kupwa Mariy wakula anch: ‘Nidi kwam kashalapol wa Yehova. Yom yawonsu yiwanleja kal yisadika.’

 Mariy waya kumutal Elizabet ku musumb wadinga pa mikandu. Pamulangwishau Elizabet kud Mariy, mwan wadinga mwivum mwa Elizabet wanyikeka. Elizabet wizula nich spiritu utumbila wamuleja anch: ‘Mariy, Yehova wakuyukishin kal. Chidi chiyukish kudi makwend a Nsalejam kwez mu chikumbu cham.’ Mariy walonda anch: ‘Nimutumbishin Yehova ni muchim wam wawonsu.’ Mariy washakama ni Elizabet mu angond asatu kurutu achirika kwol kwend ku Nazaret.

Pateshay Josef anch Mariy ukwet madikaj, wakimba kumulik. Pakwez, mwangel wamubudikina mu chilat ni wamuleja Josef anch: ‘Kangal wov wom wa kumwat Mariy. Kasadinap kwend chitil.’ Chawiy, Josef wamusenda Mariy chakwel ikala mukajend.

‘Yehova ukat kusal yom yawonsu yikatinay kusal mwiur ni pansh.’ —Kuseng 135:6