Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 62

Want Wading Mudi Mutond Ujim

Want Wading Mudi Mutond Ujim

Dichuku dimwing uchuku Nebukadinezar walata chilat chamwakamisha nakash. Chawiy chayitazukay antu end awonsu in manangu chakwel arumburil chilat chinech. Pakwez, kwikil muntu ap umwing watwisha kurumburil. Kupwa mwant wamutazuka Daniel.

Nebukadinezar wamuleja Daniel anch: ‘Pinadia nilatina, namanang chishimushimu cha mutond. Mutond winou wajimbang ni walepang djat ni mwiur. Antu awonsu a pa mangand atwishang kuuman. Wading ni mayij ma ufun ni wasongang mabuj mavud. Annam a mu masuk alalang mu urel wa mutond winou ni atujil atungang yinswal ku mitiy yau. Kupwa, mwangel washirikang mwiur. Walond anch: Katulany mutond winou ni sakurolany mitiy yau. Pakwez, chifanyidin kusha chishij ni mij yach kupwa kuchikas nich muyolal wa utad ujal ni utad wa bronze. Rudung rend rukuswimp rikal ra nnam kushik ni pakupwila mivu sambwad. Chawiy, antu awonsu akwijik anch Nzamb udi Mwant ni ukutwish kupan want wend kudi muntu mwawonsu ukutonday.’

Yehova wamuleja Daniel kurumburik kwa chilat chinech. Pajinguninay Daniel kurumburik kwa chilat chinech wova wom nakash. Ni walonda anch: ‘A Mwant!, nikatin anch chilat chinech chikala cha akankuny ney pakwez, chidi mulong weyey. Mutond ujim wakatulangau yeya mwant. Ukushadish want wey ni ukudia masuk mudi nnam wa mu masuk. Pakwez, mulong mwangel walondang kusha chishij, chirumburikin anch ukutwish kwikal kand mwant.’

Pasuta muvu, Nebukadinezar wading ni kwendangan piur pa chikumbu cha want, mu Babilon. Walonda anch: ‘Tal kujimb kwa musumb natungina. Tal usu wam!’ Padingay ni kulond, dizu diadiokala mwiur ni dialonda anch: ‘Nebukadinezar! Katat washadish kal want wey.’

Pa chisu chinicha, Nebukadinezar washadisha manangu mend ni wikala mudi nnam wa mu masuk. Amwopata pakad  kulab mu chipang ni waya kushakam ni annam. Nsuch ja Nebukadinezar jalepa jikal mudi masal ma mbur ni jinzal jend jalepa mudi ja atujil.

Pikwasuta mivu sambwad, manangu ma Nebukadinezar machirika, kupwa Yehova wamwikadisha kand mwant wa Babilon. Chawiy, Nebukadinezar walonda anch: ‘Namushiman kal Yehova, Mwant udia Mwiur. Katat nijik kal anch Yehova udi Mwant. Ukat kuyishikumwish antu akata kwitutul ni ukutwish kupan want wend kudi muntu mwawonsu ukutonday.’

“Kwibaz kukat kusambelaku chad lel kusheshik [kweza], ni muchim wa kwibaz ukat kulet kuwa.”—Jinswir 16:18