Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 60

Want Ukeza Kwikal wa Chikupu

Want Ukeza Kwikal wa Chikupu

Dichuku dimwing uchuku mwant Nebukadinezar walata chilat chimwing chikash. Chilat chinech chamwakamisha nakash ni chamukangesha kulal. Chawiy, chayitazukay in kupong end ni wayileja anch: ‘Nlejany kurumburik kwa chilat chinalatanga.’ Amuleja anch: ‘A! Mwant tuleja chilat chiwalatang .’ Pakwez, Nebukadinezar wayileja anch: ‘Teshany! anch en kiwinlejinanyap yom yinalatanga nikukujipany.’ Awiy amwakula kand mwant anch: ‘Tuleja kwetu chilat chin, chakwel tuchirumburila.’ Mwant wakula anch: ‘En wovijanangany kal pamwing chakwel windimbany. Chawiy, nlejany chilat cham!’ Amuleja kand mwant anch: ‘Kwikil muntu ap umwing udia pa mangand ukutwisha kukurumburil chilat chinech. Yom wipwila yikasiken.’

Nebukadinezar wajimana nakash ni wakwata mupak wa kuyijip antu awonsu akweta manangu adinga mwi ngand yend. Pakach pa antu inay akimbay mwant kujip pading Daniel, Shadirak, Meshak ni Abed nego. Daniel wamwita mwant chisu chikemp. Kupwa ndiy pamwing ni arund end amulembila Yehova chakwel ayikwasha. Chom ik chasalay Yehova?

Mu chishimushimu, Yehova wamuleja Daniel chilat cha Nebukadinezar ni kurumburik kwach. Pikwacha, Daniel waya kudi kashalapol wa mwant ni wamuleja anch: ‘Kangal wayijip in manangu awonsu. Nikutwish kurumburil chilat cha mwant.’ Kashalapol wamutwala Daniel kudiay Nebukadinezar. Daniel wamuleja mwant anch: ‘Nzamb wakulejang yom yikukushikena. Tesh kurumburik kwa chilat chey: Wamanang chirumbidij chijim chikweta mutu wa utad wa or, ntul ni makas ma utad wa argent, mbund ni tutaf twa mend twa utad wa bronze, mend ya utad ujal ni yidjatil yend ya utad ujal ubombakena ni kam. Kupwa, diyal dijim diadiokala ku mukandu, diawil ku mend kwa chirumbidij. Chirumbidij  chapuchoka ni rinkind wasenda rufunfut ra yom yapuchoka. Diyal diajimba dikal mukandu ni diambwika mangand mawonsu.’

Kupwa Daniel walonda kand anch: ‘Chilat chinech chirumburikin mwamu: Want wey udi mutu wa utad wa or. Utad wa argent udi want ukwikalaku kupwa kwa want wey. Kupwa kukwikal want wa utad wa bronze, ukeza kayikel mangand mawonsu. Want ukwambakenap ukwikal ni usu mudi utad ujal. Kupwa kand, kukwikal want wa yikunku yaad, chikunku chimwing chikwikal ni usu mudi utad ujal ni chikwau chikwikal ni usu mudi kam. Diyal dijim nakash dikala mukandu wawiy Want wa Nzamb. Want winou ukez kashesh mant mawonsu ni ukez kwikal wa chikupu.’

Nebukadinezar wazengama pansh kurutu kwa Daniel. Walonda anch: ‘Nzamb wey wakulejang kurumburik kwa chilat cham. Kwikil Nzamb udia mudi ndiy.’ Pa ndond pa kumujip Daniel, Nebukadinezar wamuteka kwikal mukurump wa in manangu awonsu ni in kuyikel adinga mu musumb wa Babilon. Ukutwish kujingunin mutapu Yehova wakulay malembil ma Daniel?

‘Ayikumangeja pamwing kwi ndond yipidilau mu Hebereu anch Harmagedon.’—Kujingunik 16:16