Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 65

Ester Wapandish kal Anamakwend

Ester Wapandish kal Anamakwend

Ester wading changadim mwin Yuda ushicha mu Peris mu musumb wa Suz. Mu mivu yivud, dijuku diend diading mu uswik payikwatau mu Yerusalem kudiay Nebukadinezar. Amulila kudiay musanyend Maridoke kashalapol wenday Mwant Asuwerus wa ku Peris.

Mwant Asuwerus wakimba kwat mband musu. Chawiy, atushalapol end amuletina amband avud awamp nakash, pakach pa amband inay pading Ester. Pakach pa amband amuletinau, mwant watonda Ester kwikal mwant mwad. Maridoke wamuleja Ester anch kangal walond anch udi mwin Yuda.

Mwin kwitutul Haman wading ntakel wa amakurump. Wakata anch muntu mwin mwawonsu amwifukwilang. Maridoke kitiyap kwifukwil, chawiy Haman wajimana nakash ni wakimba kumujip. Pijikay Haman anch Maridoke udi mwin Yuda, chawiy chakwatay mupak wa kuyijip in Yuda awonsu adinga mwi ngand yau. Wamuleja mwant anch: ‘In Yuda adi antu ayimp nakash, ufanyidin kuyijip.’ Asuwerus wakula anch: ‘Sal kwey yom yawonsu ukimbina kusal,’ ni wamwinkisha mbil ya kutek chijil chitadina mulong winou. Haman wateka chijil chalejana anch chifanyidin kuyijip in Yuda awonsu pa dichuku dia 13 dia ngond wa Adar. Yehova wading umen yom yiney yawonsu.

Ester kadingap kija chijil chinech. Chawiy, Maridoke wamutumina Ester mukand ufundinau chijil ni wamuleja anch: ‘Yang umuleja mwant.’ Ester walonda anch: ‘Muntu mwawonsu ukweza kumutal mwant pakad kumutazuk akumujip. Pakwez, mwant kand kal antazukap pasut kal machuku 30! Pakwez, nikuya. Anch wanlej kukwat ku mukombu wend wa want nikupand. Anch kanginkishinap mukombu wend kukwataku nikufa.’

Ester waya mu chipang cha mwant. Mwant pamumanay Ester, wamuzambwila mukombu wend wa want chakwel akwataku. Ester witapina dilau kurutu kwa mwant chad mwant wamwipula anch: ‘Ester chom ik ukimbina amboku?’ Ester wakula anch:  ‘Nikimbin weza ey ni Haman ku musambu ukusadika urel.’ Ku musambu winou, Ester wayitazuka kand ku musambu ukwau. Ku musambu wa kaad, mwant wamwipula kand Ester anch: ‘Ester chom ik ukimbina amboku?’ Ester wakula anch: ‘Kudi muntu ukimbina kwinjip pamwing ni anamakwam. Tupandishaku amboku.’ Mwant wamwipula anch: ‘Nany ukimbina kukujip?’ Ester wakula anch: ‘Muntu winou muyimp ndiy kamu Haman.’ Asuwerus wajimana nakash ni wapana mbil chakwel amujipa Haman pakad kulab.

Pakwez, kwikil muntu ap mwant wafanyina kuswimp chijil chatekay Haman. Chawiy, mwant wamuteka Maridoke kwikal ntakel wa amakurump ni wamwinkisha mbil ya kutek chijil chisu. Maridoke wateka chijil chisu chafanyina kuyikwash in Yuda kwichidij anch akimb kuyirishikish. Pa dichuku dia 13 dia ngond wa Adar, in Yuda ichidija ku makas ma akankuny nau. Kusambish pa dichuku dinidia in Yuda asambisha kusal musambu wa kuwin kwinoku muvu wawonsu.

“Akez kakutwalany kurutu kwa anzuj ni ant, mulong wa kwingambat am; ukwikalany mudi atuman kudi awiy ni kudi in mangand.”—Mateu 10:18, TMK.