Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 57

Yehova Wamutuma Jeremiy Kuya Kulejan

Yehova Wamutuma Jeremiy Kuya Kulejan

Yehova wamutonda Jeremiy kwikal muprofet wa antu a mu Yuda. Wamuleja kuyilej antu rusangu ruwamp ni kuyibabesh chakwel alika kusal yom yiyimp. Jeremiy walonda anch: ‘Pakwez, am nichidi kwam nsand. Nikutwishap kulond kurutu kwa antu.’ Yehova wamuleja anch: ‘Kangal wov wom. Nikukulej yom yiufanyidina kulond, ni nikukukwash.’

Yehova wamuleja Jeremiy atazuka amakurump awonsu a antu, chakwel apuchola nnung ya kam kurutu kwau ni ayileja anch: ‘Yerusalem akumupuchol mudi nnung ya kam yiney.’ Chisu chalonday Jeremiy piur pa yom yamulejau kudi Yehova, amakurump ajimana nakash. Mwin kupesh Pashur wamubula Jeremiy ni wamuteka makas ni mend mu mabay ma kufuril ni ma kupamp nich jimbwambu. Uchuku wa kabuj, Jeremiy katwishap kunyikek. Chisu chamudioshau Jeremiy kudi Pashur pamanch, Jeremiy walonda anch: ‘Nikand kal. Nikulejanap kand.’ Pakwez, walika kusal mudimu winou? Bwat. Patongay Jeremiy mulong wa yom yivud, ndiy walonda anch: ‘Uruu wa Yehova udi mudi kasu kadia mu muchim wam. Nikulikap mudimu wa kulejan.’ Jeremiy wadandamena kuyibabesh antu.

Pasuta mivu yivud, kwikala mwant musu mu Yuda. In kupesh ni aprofet a makasu akisa rusangu ra Jeremiy. Ayileja in kutakel anch: ‘Muntu winou ufanyidin kufa.’ Jeremiy walonda anch: ‘Anch wanjipany, ukwinjipany kwam pakad mulong. Nilondining kwam mazu ma Yehova, kadiap mazu mam bwat.’ Pateshau in kutakel mazu minam awiy alonda anch: ‘Muntu winou chifanyidinap komb kumujip.’

 Padandamenay Jeremiy kulejan, in kutakel ajimana nakash. Awiy amuleja mwant anch chifanyidin kumujip Jeremiy. Mwant wayileja anch afanyidin kusal yom yawonsu yikatinau piur pa Jeremiy. Amukwata Jeremiy ni amudjibwila mu dijiy dilemp diadinga ni malau ni ading atongin anch ukufil mwinimwa. Jeremiy wisampola malau.

Kupwa mukurump wa dirumburish Ebed melek waya kumulej mwant anch: ‘In kutakel amudjibwilang kal Jeremiy mu dijiy! Anch tumudioshinap ukufa.’ Mwant wamuleja Ebed melek asenda antu amakundj 30 chakwel amudiosha Jeremiy mu dijiy. Ov, tufanyidinap kwikal mudi Jeremiy, kitiyap anch muntu ap umwing amukangesha kusal mudimu wend wa kulejan?

‘En akez kakukisany kudi antu awonsu mulong wa dijin diam, pakwez mwawonsu ukeza kajijaman ni kushik kwinsudien winiwa ndiy ukupandishau.’ —Mateu 10:22