Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Malejan Ukutwisha Kwilej mu Bibil

 DILEJAN 67

Mbumbu ja Yerusalem

Mbumbu ja Yerusalem

Mivu yikemp kwinyim, Nehemiy kashalapol wa Mwant Aritaserisis, wading mwin Isarel ushicha Mwin ngand ya Peris mu musumb wa Suz. Mwanamakwend a Nehemiy weza ku Yuda nich rusangu riyimp rilondina anch: ‘Antu achirikina ku Yerusalem kadiap mu diking. Mbumbu ni yis ya musumb yasheshau kudi in Babilon kayitungirilap kwau.’ Nehemiy winana nakash. Wakata kuya ku Yerusalem mulong wa kuyikwash chawiy chalembilay chakwel mwant amwitiyija kuya kwinikwa.

Kupwa, mwant wamana anch Nehemiy wading ni ushon. Mwant wamwipula anch: ‘Kandikal nikumanap mutapu winou. Yom ik yiyimp yidiaku?’ Nehemiy wamwakula anch: ‘Mulong wak nikulika kwinan anch musumb wam, Yerusalem, amusheshin.’ Mwant wamwipula anch: ‘Chom ik ukimbina nikusadina?’ Kapamp kamwing, Nehemiy walembila mu muchim wend. Kupwa wakula anch: ‘Nlikaku amboku niya ku Yerusalem mulong wa kutungiril mbumbu.’ Mwant Aritaserisis wamuleja Nehemiy anch ukutwish kuya, pakwez, mwant wakimba kwijik anch pakuyay Nehemiy ukushik nawamp. Mwant wamuteka Nehemiy kwikal ntakel wa mu Yuda ni wamwinkisha mabay ma kusal nich yis ya musumb.

Pashikay Nehemiy mu Yerusalem washinshikina mbumbu ja musumb. Chawiy, chayikumangejay in kupesh ni ant mulong wa kuyilej anch: ‘Mbumbu jiyipin nakash. Tufanyidin kujitungiril.’ Antu itiya ni asambisha kutungiril mbumbu.

Pakwez, akankuny a in Isarel asambisha kuyisip ni kuyilond anch: ‘Muyeu umwing ukwez mulong wa kuumbwol mbumbu jiutunginana.’ In kutung kateshap yom yayilondau ni adandamena kutung. Mbumbu jalepa ni jikala jikash.

Akankuny akwata mupak wa kunyingumuk musumb wa Yerusalem chakwel aukwata. Pateshau in Yuda mazu minam, ova wom nakash. Pakwez, Nehemiy wayileja anch: ‘Kangal wakamany. Yehova utulamin.’ Wateka atulam mulong wa kuyiking antu adinga ni kutung chakwel akankuny kakutwishap kuyirishikish.

 Mudimu wa kutunguril mbumbu ni wa kurijek yis wapwa mu machuku 52. Nehemiy wayitazuka in Levi awonsu ku Yerusalem mulong wa kusal musambu wa kupwish kwa mudimu wa kutung mbumbu. Watenchika yisak yaad ya in kuwang. Akandama pa ma escalier mulong wa kushik piur pa mbumbu kusutil ku Chis cha Ruwengil ni anyingumuka ku mitambu kushalijan ya musumb. Abula mpuny, tudiad ni yisaj ni amuwangina Yehova. Esidera waya ni chisak chimwing cha in kuwang ni Nehemiy waya ni chisak chikwau, kushik ni pasankanijanau ku tempel. Antu awonsu—amakundj, amband nau an—apana milambu yau kudi Yehova ni asala musambu. Mazu mau ma musangar movakana kulemp nakash.

‘Ut wawonsu ukuchilau mulong wa kukurishish ukez kakangany.’ —Isay 54:17